İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 782 Hüküm no: 1058 Orijinal metin no: [107b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatîce bt. Bayram’ın Mehmed b. Mustafa’ya olan borcunu kabul ettiği Mahmiye-i İstanbul’da Ali Paşa-yı Atîk mahallesi sâkinlerinden Mehmed b. Mustafa meclis-i şer‘-i hatîr lâzımü’t-tevkīrde Hatîce bt. Bayram nâm hâtun mahzarında üzerine da‘vâ ve takrîr-i kelâm edip mezbûre Hatîce bundan akdem eşyâ-i memlûkemden iki yüz akçeye bir kilim ve iki yüz akçeye bir döşek ve üç yüz akçeye bir top beylik çuha ve üç yüz akçeye iki yorgan ve yüz akçeye bir çarşaf ve yüz akçeye bir minder ve üç yüz akçeye bir tencere ile iki sahan bir tava iştirâ ve kabz edip zimmetinde eşyâ-i mezkûre semenleri müctemi‘ bin beş yüz akçe hakkım vardır suâl olunup alıverilmesi matlûbumdur dedikde gıbbe’s-suâl mezbûre Hatîce cevâbında eşyâ-i mezkûre bahâsından mezbûr Mehmed Beşe’ye zimmetinde bin beş yüz akçe deyni olduğunu bi tav‘ihâ ikrâr ve i‘tirâf etmeğin alâ mûcib-i ikrârihâ meblağ-ı mezbûru merkūm Mehmed Beşe’ye edâ ve teslîme mezbûre Hatîce’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâlis şehri Rebî‘ilâhir sene 1074. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Baba Resûl b. [Rıdvan] ve gayruhüm.