İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 784 Hüküm no: 1062 Orijinal metin no: [108a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sunullah Çelebi b. Abdülbâkī’nin evini Hoşelhan Hâtun’a sattığı Mahmiye-i İstanbul’da Neslişah Sultan mahallesi sükkânından Sunullah Çelebi b. Abdülbâkī meclis-i şer‘-i hatîrde işbu hâfızatü’l-kitâb Hoşelhân bt. Abdullah nâm hâtun mahzarında ikrâr ve takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafdan Hayrünnisâ nâm hâtun mülkü ve bir tarafı Mustafa b. Cuma mülkü ve bir tarafdan Ali Beşe b. Abdullah mülkü ve bir tarafdan tarîk-i âma müntehî tahtânî iki oda ve cüneyne ve kenîfi müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûre Hoşelhân Hâtun’a on bir bin iki yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr on bir bin iki yüz akçeyi mezbûre Hoşelhân Hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezkûr mezbûr Hoşelhân Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn [min] şehri Rebî‘ilâhir sene 1074. Şuhûdü’l-hâl: Mustafa Efendi b. Ali el-İmâm, Mustafa Halîfe b. Mehmed el-Müezzin, Ali b. Ali el-Kayyım, Mustafa b. Ahmed ve gayruhüm.