İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 785 Hüküm no: 1064 Orijinal metin no: [108a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın Molla Gürani vakfına ait ve tasarrufunda olan odaları Sâlih Çelebi’ye ve Canfedâ Hâtun’a kiraladığı Mahmiye-i İstanbul’da Eski Saray kurbunda vâki‘ Molla Gürânî mahallesi sâkinlerinden Ali b. Abdullah nâm kimesne meclis-i şer‘-i hatîrde Sâlih Çelebi b. Süleyman ve Canfedâ Hâtun bt. Abdullah mahzarlarında ikrâr-ı tâm ve takrîr-i kelâm edip merhûm Molla Gürânî vakfı olan odalardan bir tarafı Molla Gürânî hamamı ve bir tarafı Hacı Cafer ve bir tarafı Düğmeci Yusuf tasarruflarında olan odalar ve bir tarafı tarîk-i hâs ile mahdûd icâre-i mu‘accele ve ücret-i müeccele-i ma‘lûmeteyn ile mutasarrıf olduğum odanın selâse-i erbâ‘ının hakk-ı tasarrufunu merkūm Sâlih Çelebi’ye yirmi bin akçe mukābelesinde ve bir rub‘unun tasarrufunu merkūme Canfedâ Hâtun’a on bin akçe mukābelesinde izn-i mütevellî ile ferâğ ve tefvîz, ol dahi tefevvüz ve kabûl eylediklerinden sonra bedel-i tefevvüz olan meblağateyn-i mezbûreyn merkūm Sâlih Çelebi’nin mukaddemâ kıbel-i şer‘den mansûb vasîsi olduğum hasebiyle zimmetimde olan yirmi bin akçesiyle ve mezbûre Canfedâ Hâtun’un dahi cihet-i karz-ı şer‘îden zimmetimde olan on bin akçesine takās edip anlar dahi mukāssa ve kabûl eylediler ba‘de’l-yevm mezbûr oda merhûm Sâlih Çelebi’nin mezbûre Canfedâ Hâtun’un hakk-ı müfevvazlarıdır, emsâli tasarruf eyledikleri gibi ale’l-iştirâk anlar dahi tasarruf eylesinler dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis ve’l-ışrîn şehri Rebî‘ilâhir sene 1074. Şuhûdü’l-hâl: Abdullah Efendi b. Himmet, İlyas b. Ramazan el-Müezzin, Mustafa Beşe b. Ramazan, Abdullah b. Yusuf ve gayruhüm.