İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 789 Hüküm no: 1071 Orijinal metin no: [109a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Reftar bt. Abdullah’ın terekesi hususunda Hatice bt. Ahmed’in Ali Çelebi ile bir davasının kalmadığı Mahmiye-i İstanbul’da Karabaş mahallesinde sâkine iken fevt olan sagīre Hatîce bt. el-Hâc Ahmed’in verâseti zevci Kurt Ali ile vâlidesi Refta[r] bt. Abdullah ve li eb kız karındaşı Râbia’ya ve li üm karındaşı Şaban b. Hasan nâm sagīre münhasıra olduğu şer‘an zâhir ve müte‘ayyin oldukdan sonra merkūme Reftar kendi tarafından asâleten ve sagīr-i mezbûr Şaban tarafından vesâyeten meclis-i şer‘de müteveffât-ı mezkûrenin kıbel-i şer‘den mansûb vasîsi olan işbu bâ‘isü’l-kitâb el-Hâc Ali Çelebi mahzarında ikrâr ve takrîr-i kelâm edip müteveffât-ı mezbûre Hatîce hidânemde iken taraf-ı şer‘den takrîr olunan yevmî on beş akçe nafaka-i mefrûzasını ile’l-vefât ahz u kabz ettiğimden mâ‘adâ müteveffât-ı mezbûre ise babasından intikāl eden nukūddan hissesini ve kendi hissemi ve beherine ber mûceb-i defter-i kassâm tamâmen yedinden aldığımı müş‘ir mukaddemâ kassâm-ı askerî olan Mehmed Efendi huzûrunda yedine hüccet-i şer‘iyye vermişdim hâlâ dahi mezbûr Ali Çelebi ile tereke-i müteveffât-ı mezbûra müte‘allika da‘vâm ve nizâ‘ım yoktur dedikde mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn [min şehri] Rebî‘ilâhir sene 1074. Şuhûdü’l-hâl: Mehmed Çelebi b. Ali, el-Hâc Ahmed b. Mahmud, el-Hâc Halil Çelebi, Berber b. Mehmed el-Müezzin ve gayruhüm.