İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 790 Hüküm no: 1072 Orijinal metin no: [109a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır Beşe’nin evini Perizâd bt. Abdullah’a sattığı Mahmiye-i İstanbul’da Kepeciler mahallesi sükkânından Hızır Beşe b. Şaban meclis-i şer‘-i hatîr-i lâzımü’t-tevkīrde bâ‘isetü’l-vesîka Perizâd bt. Abdullah nâm hâtun tarafından ikrâr-ı âtî tasdîke vekîl olup Mehmed Bey b. Yusuf ve Mehmed b. İsmail şehâdetleri ile şer‘an vekâleti sâbite olan Hüseyin Bey b. Mehmed mahzarında ikrâr ve i‘tirâf edip silk-i mülk-i sahîhimde münselik olup mahalle-i mezbûrede vâki‘ bir tarafdan Muslu mülkü ve bir tarafdan Ömer Efendi mülkü ve iki tarafdan tarîk-i âm ile müntehî fevkānî bir oda ve bir sofa ve bir mutfak ve tahtânî bir oda ve kenîfi müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müvekkile-i mezbûre Perizâd Hâtun’a yirmi dört bin nakid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezbûr yirmi dört bin akçeyi müvekkile-i mezbûre Perizâd Hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezkûr müvekkile-i mezbûre Perizâd Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilâhir sene 1074. Şuhûdü’l-hâl: El-Hâc Mehmed Efendi b. Yusuf, Ebûbekir Çelebi b. el-Hâc Ali, Ömer Beşe b. Abdullah, Mehmed b. Abdullah ve gayruhüm.