İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 793 Hüküm no: 1076 Orijinal metin no: [110a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Reis Mustafa b. Osman’ın Mehmed Beşe’nin iki fıçı yağının bedelini ödemesi Husûs-ı âtî [için] tüccâr tâifesinden Mehmed Beşe nâm râcil mahfil-i kazâda, sefîne reislerinden Mustafa b. Osman mahzarında üzerine takrîr-i da‘vâ edip vilâyet-i Rumeli’nde Akkirman İskelesi’nde mahmiye-i İstanbul’da getirmek için mülküm olan iki tulum ve beş yedek ve üç desti ve iki fıçı yağımı mezbûr Mustafa reisin sefînesine tahmîl edip mahmiye-i mezbûreye geldikde zikr olunan iki tulum ve beş yedek ve üç desti yağı bana teslîm edip iki fıçı yağımı vermemişdir, suâl olunup teslîmine tenbîh olunmak matlûbumdur [dedikde], gıbbe’s-suâl mezbûr Mustafa reis cevâbında kaziyye vech-i meşrûh üzre olup lâkin Terkos nâhiyesi önünde bi emrillâhi te‘âlâ fırtına olup sefînem gark olmak ihtimâli karîb olduğu ecilden, sefîneme hiffet hâsıl olmak için zikr olunan iki fıçı [ve] ba‘zı kimesnelerin sefîneme tahmîl eyledikleri emti‘ayı dahi deryâya ilkā edip sefîneme hiffet hâsıla olmuşdur deyicek fi’l-vâki‘ zikr olunan iki fıçıyı deryâya ilkā edip ketm ve ihfâ etmediğine mezbûr Mustafa reise yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince hîn-i ilkāda olan ba‘de’s-sübût kıymetini edâya tenbîh birle mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūm. Şuhûdü’l-hâl: El-Hâc Ahmed b. Mahmud, Abdülkerim Ağa b. ( ), Abdi Çelebi b. ( ) ve gayruhüm.