İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 797 Hüküm no: 1082 Orijinal metin no: [110b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ev yapmak üzre para alıp evi yapmayan Yani v. İstemad parayı aldığı kişilere geri ödeyeceği Mahmiye-i İstanbul’da Kırkçeşme sâkinlerinden işbu ashâbü’l-kitâb Mustafa b. Hamza ve Şaban b. Ahmed ve Mustafa b. Ali nâm kimesneler mahfil-i kazâda, tüccâr tâifesinden Yani v. İstemad nâm zimmî mahzarında mezbûr Mustafa b. Hamza takrîr-i da‘vâ edip merkūm Yani yedine bir menzil binâ eylemek için ber vech-i peşîn üç bin akçe vermiş idim, menzil-i merkūmu binâ etmediği ecilden makbûzu olan meblağ-ı merkūm üç bin akçeyi ve mezbûr Şaban mezkûr Yani zimmetinde yedimden müşterâ ve makbûz vezn ve adedi beynimizde ilm-i şer‘î ile ma‘lûm mismâr bahâsından üç yüz seksen bir akçe hakkım vardır, hâlâ meblağ-ı mezbûr üç yüz seksen bir akçemi ve mezbûr Mustafa mezkûr Yani zimmetinde yedimden müşterâ ve makbûz vezn ve adedi ilm-i şer‘î ile ma‘lûm mismâr bahâsından yedi yüz akçe hakkımı taleb ederiz suâl olunup bize teslîme tenbîh olunmak matlûbumuzdur dediklerinde, gıbbe’s-suâl mezbûr Yani cevâbında vech-i meşrûh üzre mezbûr Mustafa b. Hamza’ya üç bin akçe ve mezbûr Şaban’a üç yüz seksen bir akçe ve mezbûr Mustafa’ya yedi yüz akçe zimmetimde vâcibü’l-edâ ve lâzımü’l-kazâ deynim vardır deyû ikrâr etmeğin alâ mûceb-i ikrârihî meblağ-ı mezbûru mezkûrdan vech-i muharrer üzre edâ ve teslîme mezbûr Yani’ye tenbîh birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ahmed Çelebi b. Mahmud, Abdi Çelebi b. Hüseyin, Veli b. Bayram, Nasûh b. Rıdvan ve gayruhüm.