İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 798 Hüküm no: 1084 Orijinal metin no: [111a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. Beto’nun üç hissesini sattığı evin geri kalan hissesinin Goco v. Kiga’ya ait olduğu Fi’l-asl vilâyet-i Rumeli’nde livâ-i Avlonya’da Premedi kazâsına tâbi‘ Argorda nâm karyeden olup mahmiye-i İstanbul’da Abdi Subaşı mahallesinde sâkin iken bundan akdem hâlik olan Yamandi v. Beto’nun li ebeveyn ammi ve bi’l-usûbeti’n-nesebiyye hasren vârisi olan Goco v. Kiga nâm zimmî mahfil-i kazâda, zikri âtî menzilin rub‘ hisse-i şâyi‘asına vâzı‘atü’l-yed olan Öskelena bt. Hıriskala nâm nasrâniyyenin zevci ve tarafından husûs-ı âtîye sâbitü’l-vekâle vekîli olan Hürmüz v. Dimitri ve Ezmerağda bt. Hıriskala nâm nasrâniyyenin zevci ve tarafından husûs-ı âtîye sâbitü’l-vekâle vekîli olan Hürmüz v. Dimitri ve Ezmerağda bt. Hıriskala nâm nasrâniyyenin zevci tarafından husûs-ı âtîye kezâlik sâbitü’l-vekâle vekîli olan Laskari v. Petro ve müdde‘î-i mezbûr Goco’nun sulbî kebîr oğlu Kiga nâm zimmîler muvâcehelerinde üzerlerine takrîr-i da‘vâ edip mahmiye-i mezbûre hısnı ebvâbından Samadya kapısı dâhilinde el-Hâc Hüseyin mahallesinde vâki‘ bir tarafı kemhacı Dimitri mülküne ve bir tarafı meyhâneci Yanaki mülküne ve bir tarafı Baryam mülküne ve bir tarafı tarîk-i âma müntehî beş bâb fevkānî odayı ve mahzeni ve muhavvata ve kileri ve iki bi’r-i mâ ve iki kenîfi ve müşterek diğer bi’r-i mâyı ve zât-ı eşcâr-ı müsmire bahçeyi hâvî mülk menzilin mâliki olan hâlik-i mezbûr Yamandi hâl-i hayâtında ve kemâl-i sıhhatinde menzil-i mahdûd-ı mezkûru dört sehim i‘tibâr edip sihâm-ı mezbûrun üç sehm-i şâyi‘ini mezbûrun Kiga ve Üskılina ve Ezmerağda’ya beş yüz riyâlî guruşa bâtten bey‘ ve teslîm anlar dahi ale’l-iştirâki’s-seviy iştirâ ve tesellüm ve kabûl ve kabz eyledikden sonra semen-i mezbûrun üç yüz riyâlî guruşu mezkûrûnun yedlerinden ahz u kabz edip meblağ-ı bâkī iki yüz riyâlî guruşunu mezkûrun Kiga ve Ezmerağda ve Üskılina’ya hibe-i tâmme ile hibe ve temlîk edip anlar dahi meclis-i hibede ittihâb ve kabûl ve temellük eyledi. Ol vechile menzil-i mahdûd-ı mezkûrun selâse-i erbâ‘ hissesi mezkûrûnun ale’l-iştirâki’s-seviy mülk-i müşterâsı oldukdan sonra menzil-i mezkûrun rub‘ hissesi merkūm Yamandi’nin ile’l-helâk mülkü ve hakkı olup ba‘de helâkihî hisse-i mezbûre irsen bana isâbet ve intikāl etmişken mezkûrun bi gayri hakkın zabt ve tasarruf ederler, suâl olunup kasr-ı yed ve bana teslîme tenbîh olunmak matlûbumdur dedikde gıbbe’s-suâl mezbûrun cevâblarında, fi’l-vâki‘ kaziyye bâlâda tafsîli mürûr ettiği vech üzre olup menzil-i mahdûd-ı mezkûrun rub‘ hisse-i şâyi‘ası hâlik-i mezbûrun ile’l-helâk mülkü ve hakkı olup ba‘de helâkihî li ebeveyn ammi ve bi’l-usûbeti’n-nesebiyye hasren vârisi olan müdde‘î-i mezbûr Goco’ya bi hasebi’l-irsi’ş-şer‘î isâbet ve intikāl edip ol vechile hisse-i meşrûha müdde‘î-i mezbûrun mülk-i mevrûsudur deyû her biri ikrâr ve i‘tirâf etmeğin alâ mûcib-i i‘tirâfihî ba‘de’l-hükm müdde‘î-i mezbûr Goco meclis-i şer‘de vekîlân-ı mezbûrân Hürmüz ve Laskari ve mezbûr Kiga mahzarlarında bi’l-verâse ikrâr ve i‘tirâf edip bâlâda teslîmine tenbîh olunan rub‘ hisse-i şâyi‘amı mezkûrun bana teslîm ben dahi tesellüm ve kabz eyledim. Ol vechile menzil-i mahdûd-ı mezkûrun selâse-i erbâ‘ hissesi ale’l-iştirâki’s-seviy mezkûrun Kiga ve Üskılina ve Ezmerağda’nın mülk-i müşterâsıdır ve rub‘ hissesi benim mülk-i mevrûsumdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Ahmed Hulusi b. Abdülkerim, Hasan Ağa b. Abdullah, Abdullah Efendi b. Mehmed el-İmâm, Hasan Beşe b. Süleyman ve gayruhüm.