İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 800 Hüküm no: 1086 Orijinal metin no: [111a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Düz Şucâ vakfına ait Pîrîpaşa’daki berber dükkanının kullanım hakkının Hatemcan bt. Mahmud’a ait olduğu Mahmiye-i İstanbul’da Unkapanı kurbunda Üsküplü mahallesinde sâkine işbu hâmiletü’s-sifr Hatemcan bt. Mahmud nâm hâtun mahfil-i kazâda, mahmiye-i mezbûrede Düz Şucâ‘ vakfının hâlâ mütevellîsi olan Abdünnebî b. Halil mahzarında üzerine takrîr-i da‘vâ edip vakf-ı mezbûrdan olup Bezzâzistân-ı atîk kurbunda Pîrî Paşa yanında vâki‘ lede’l-ahâlî ve’l-cîrân ma‘lûmü’l-hudûd berber dükkânı icâre-i mu‘accele ve müeccele-i ma‘lûmeteyn ile mutasarrıfesi olan Bahtiyar bt. Abdullah nâm hâtun bin yetmiş senesi Saferü’l-hayrın gurresinden vakf-ı mezbûra mütevellî olan Mehmed Ağa’nın izin ve ma‘rifetiyle bana ferâğ ve ta‘vîz [tefvîz] edip ben dahi tefevvüz ve kabûl ve kabz edip mütevellî-i mezbûr hâlâ mührünü hâvî temessük verip bu âna değin tasarrufumda iken mütevellî-i mezbûr Abdünnebî tasarrufa mâni‘ olur, suâl olunup men‘ ve def‘ olunmak matlûbumdur deyû mazmûnu min külli’l-vücûh takrîr-i meşrûhunu nâtık ve târih-i mezbûr ile müverraha ve mütevellî-i mezbûrun imzâ ve tahrîrini müştemil temessük ibrâz edip mütevellî-i mezkûr Abdünnebî muvâcehesinde feth ve kırâ’at ve istintâk olundukda mazmûn-ı temessükü ikrâr edip lâkin temessükde tahrîr olunan Hatemcan müdde‘iyye-i mezbûre idiğini inkâr edicek müdde‘iyye-i mezbûreden müdde‘âsına mübeyyine beyyine taleb olundukda udûl-i müslimînden olup mahalle-i mezbûre sükkânından Mustafa b. Hüseyin ve Hasan b. Turgud nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu müdde‘iyye Hatemcan dükkân-ı mesfûrun icâre-i mu‘accele ve müeccele-i ma‘lûme ile mutasarrıfesi olup tahrîr olunan Hatemcan idiğine şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın [111b] mûcebince zikr olunan müdde‘iyye-i mezbûre yedinde ibkā olunup bî-vech mu‘ârazadan mütevellî-i mezbûr men‘ birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn [min] şehri Rebî‘ilâhir li sene erba‘a ve seb‘în ve elf. Şuhûdü’l-hâl: Abdülkerim Ağa b. ( ) muhzırbaşı, Abdi Çelebi b. Hüseyin, Şükrullah Bey b. Mustafa ve gayruhüm.