İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 801 Hüküm no: 1087 Orijinal metin no: [111b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Odabaşı b. Hüseyin’in ev kirası mes’elesinde Emetullah Hâtun bt. Musa Efendi ile sulh oldukları Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Beyceğiz mahallesinde umdetü’l-müderrisîni’l-kirâm zübdetü’l-muhakkikīni’l-fihâm Kevâkibîzâde demekle şehîr eş-Şeyh Mehmed Efendi’nin sâkin olduğu menziline varıp zeyl-i rakīmde muharrerü’l-esâmî olan müslimîn huzûrlarında akd-i meclis-i şer‘-i şerîf eyledikde medîne-i Ebâ Eyyûb-i Ensârî -radiye anhu Rabbihi’l-Bârî - mahallâtından Baba Haydar mahallesinde sâkin Sefer Odabaşı b. Hüseyin meclis-i ma‘kūd-ı mezbûrda, zikri âtî vakıf menzilin hasbî mütevellîsi Abdullah Efendi huzûrunda meşrûtun-lehâdan Emetullah Hâtun bt. el-mevlâ el-merhûm Musa Efendi muvâcehesinde ikrâr ve takrîr-i kelâm edip zikr olunan Baba Hızır mahallesinde vâki‘ bir tarafdan Hüseyin b. Abdullah mülkü ve bir tarafdan Mu‘arrif Kasım Çelebi mülkü ve bir tarafdan Hazret-i Ebâ Eyyûb-i Ensârî’nin vakıf odaları ile el-Hâc Fethullah mülkü ve bir tarafdan tarîk-i âm ile mahdûd olup muhavvata-i dâhiliyyesi dört bâb fevkānî oda ve bir hamam ve bir kenîf ve üç sofa ve dehliz ve bir tahtânî mutfak ve bir kiler ve bir bi’r-i mâ ve cüneyneyi müştemil olan mülk menzilin mâliki olan mezkûre Emetullah’ın babası olup sâbıkan Maraş Kadısı mezbûr Musa Efendi beraber mezbûru vakf ve haps edip dâhiliyyesinin süknâsını kendiden sonra evlâdına ve evlâd-ı evlâdına ve ba‘de’l-inkırâz bir cihet-i mü’ebbedeye şart ve ta‘yîn eyledikden sonra vâkıf-ı mezbûr Musa Efendi vefâtından sonra ber mûceb-i şart-ı vâkıf merhûm-ı mezbûr Musa Efendi’nin sulbiye kebîre kızı mezkûre Emetullah Hâtun’a mutasarrıfe ve sâkine iken îcâr-ı sahîh olmak zu‘muyla Hatîce nâm hâtuna on dokuz bin akçe icâre-i mu‘accele ve yevmî bir akçe ücret-i müeccele ile îcâr ve teslîm mezbûre Hatîce dahi ba‘de’l-istîcâr ve’l-kabz menzil-i merkūmun tasarrufunu bana kırk bin akçe bedel-i makbûz mukābelesinde fâriğa olup ben dahi ba‘de’t-tefevvüz menzil-i merkūmun ba‘zı mevâzi‘ini müceddeden binâ ve ba‘zı mevâzi‘ini imâret ve meremmet eylediğimden sonra merkūme Emetullah menzil-i mezbûrun bana süknâsı meşrûtdur, vech-i muharrer üzre îcâr sahîh değildir deyû üzerime da‘vâ edip ve takrîr-i meşrûhunda muvâfık vakfiye-i ma‘mûlün-bihâ ibrâz edip menzil-i mezkûru ahz u kabz etmekle ben dahi menzil-i merkūmun imâret ve meremmetine harc ve sarf eylediğim kırk bin akçeye mezbûr Emetullah’dan da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî vesâtat-ı muslihîn ile da‘vâ-i meşrûhamdan mezbûr Emetullah beni on üç bin akçe nakid râyic fi’l-vakt akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr on üç bin akçeyi meclis-i ma‘kūd-ı mezbûrda merkūme Emetullah yedinden tamâmen ahz u kabz edip bedel-i menzil-i merkūma ve ebniyeye müte‘allika da‘vâdan ibrâ ve iskāt edip min ba‘d menzil-i mezkûrda ve ebniye-i meşrûtada ve kıymetinde benim için hak ve alâkam yoktur dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr, ba‘dehû ma‘an irsâl olunan Hızır b. Abdünnebî ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Rebî‘ilâhir li sene erba‘a ve seb‘în ve elf. Şuhûdü’l-hâl: Eş-Şeyh Abdullah Efendi b. İsâ, Osman Efendi b. Mehmed el-Müderris, Halil Halîfe b. Receb el-Müezzin, Molla Şaban b. Receb el-Mübâşir, Kasım Beşe b. Halil tenekeci, Şaban Efendi b. Resûl, Mehmed Bey b. Bayram, Mustafa Beşe b. ( ) el-Mumcu, el-Hâc Mehmed b. ( ) el-Müezzin.