İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 802 Hüküm no: 1088 Orijinal metin no: [111b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa ve Râbia isimli çocukların vasîsi Hasan Çelebi’nin Receb Çelebi’deki alacaklarını tahsil ettiği Mahmiye-i İstanbul’da Karabaş mahallesi sükkânından Mustafa ve Râbia ibney Ahmed nâm sagīrânın tesviye-i umûrlarına kıbel-i şer‘den mansûb vasîleri olan Hasan Çelebi b. Mehmed meclis-i şer‘de işbu bâ‘isü’l-kitâb Receb Çelebi b. Veli mahzarında ikrâr ve takrîr-i kelâm edip târih-i kitâbdan iki sene mukaddem sagīrân-ı merkūmânın mâllarından mezbûr Receb Çelebi zimmetinde onu on bir buçuk hesâbı üzre on bin akçe asl-ı mal ve üzerine devr-i şer‘î ile ilzâm-ı ribh olan senede bin beş yüz akçeden iki senede üç bin akçe ki cem‘an on üç bin akçeden bin beş yüz akçeden mukaddemâ vasîleri olan Anter bt. Veli nâm hâtun ahz u kabz eyledikden sonra mezbûre Anter vesâyet-i merkūmeden azl olunup ben yerine kıbel-i şer‘den vasî nasb olunmağla hâlâ vesâyetim hasebiyle mezbûr Receb Çelebi zimmetinde olan on bin akçe asl-ı mal ve üzerine bir senede devr-i şer‘î ile ilzâm-ı ribh olan bin beş yüz akçe ki cem‘an on bir bin beş yüz akçeyi vesâyetim hasebiyle mezbûr Receb Çelebi yedinden tamâmen ahz u kabz eyledim ba‘de’l-yevm sagīrân-ı mezbûrânın asl-ı mâllarından ve murâbahadan mezbûr Receb Çelebi zimmetinde bir akçe ve bir habbe bâkī kalmadı dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūme. Şuhûdü’l-hâl: Hüseyin Efendi [b.] İbrahim el-İmâm, Ali Beşe b. Üveys el-Müezzin, Mehmed Çelebi b. Hüseyin, Mehmed b. Ali ve gayruhüm.