İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 803 Hüküm no: 1089 Orijinal metin no: [111b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aynî Hâtun bt. Hasan’ın evini Ayşe bt. Mehmed’e sattığı Mahmiye-i İstanbul’da Yenibahçe kurbunda Arpa Emîni mahallesi sâkinelerinden Aynî Hâtun bt. Hasan meclis-i şer‘-i hatîr-i lâzımü’t-tevkīrde Ayşe bt. Mehmed nâm hâtun mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Mehmed Ağa mülkü ve bir tarafı hamam bahçesi ve bir tarafdan Hacı Ali Bey mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve iki sofa ve bir tahtapûş ve bir kenîfi müştemil mülk menzilimi, cemî‘ tevâbi‘ ve levâhıkı ve kâffe-i menâfi‘ ve merâfıkı ile merkūme Ayşe Hâtun’a nakid râyic fi’l-vakt on dokuz bin altı yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabz ve tesellüm eyledikden sonra semeni olan meblağ-ı mezbûr on dokuz bin altı yüz akçeyi müşteriye-i mezbûre Ayşe Hâtun yedinden bi’t-tamâm ve’l-kemâl ahz u kabz eyledim ba‘de’l-yevm menzil-i merkūm mezbûre Ayşe Hâtun’un mülk-i müşterâsı olmuşdur keyfe mâ yeşâ’ ve yahtâr mutasarrıfe olsun dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâlis min Cemâziyelevvel li sene erba‘a ve seb‘în ve elf. Şuhûdü’l-hâl: Hasan Efendi b. Mahmud el-İmâm, Ali Halîfe b. Mustafa, Bayram b. Sâlih, İbrahim Ağa b. Hasan, Hızır Beşe b. Şaban, Receb b. Durmuş, Mustafa Bey berber ve gayruhüm.