İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 804 Hüküm no: 1091 Orijinal metin no: [112a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hayyat Panayot ile hayyat Petro’nun birbirlerinin zimmetlerini ibrâ ettikleri Mahmiye-i İstanbul’da Yemiş iskelesi kurbunda Hayyât tâifesinden Panayot v. Vasil nâm zimmî meclis-i şer‘-i hatîr lâzımü’t-tevkīrde tâife-i mezbûreden Petro v. Balas nâm zimmî muvâcehesinde ikrâr ve takrîr-i kelâm edip mezbûr Petro zimmetinde cihet-i deyn-i şer‘îden dört yüz esedî guruş hakkım olup hâlen meblağ-ı mezbûr dört yüz esedî guruşu merkūm Petro yedinden tamânen ahz u kabz eyledim min ba‘d husûs-ı mezbûra ve gayrıya müte‘allika vechen mine’l-vücûh ve sebebin mine’l-esbâb da‘vâ ve nizâ‘ım yoktur dedikde gıbbe’t-tasdîk merkūm Petro dahi meclis-i şer‘-i şerîfde mezkûr Panayot muvâcehesinde ikrâr ve i‘tirâf edip mukaddemâ mezbûr Panayot benden fâ’ide nâmına yüz yirmi esedî guruş almışdı deyû mezbûr Panayot’dan da‘vâ eylemişdim hâlâ zikr olunan yüz yirmi esedî guruş da‘vâsından mezbûr Panayot’un zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Cemâziyelevvel sene 1074. Şuhûdü’l-hâl: İbrahim Beşe b. Hasan, Murtaza Beşe b. Hasan, Ahmed Çelebi b. Mahmud, Abdi Çelebi b. Hüseyin ve gayruhüm.