İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 804 Hüküm no: 1092 Orijinal metin no: [112a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Himmet’in Ali Bey b. Hüseyin’den muhâlaa yoluyla boşandığı Mahmiye-i İstanbul’da Hoca Hayreddin mahallesi sâkinelerinden Raziye bt. Himmet nâm hâtun meclis-i şer‘de işbu sâhibü’l-kitâb zevci Ali Bey b. Hüseyin nâm kimesne mahzarında ikrâr ve takrîr-i kelâm edip zevcim mezbûr Ali Bey zimmetinde mütekarrir ve ma‘kūdun- aleyh olan bin iki yüz akçe mehr-i müeccelimin altı yüz akçesini mezbûr Ali Bey yedinden ahz u kabz edip zimmetinde bâkī altı yüz akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr Ali Bey ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika cemî‘ da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis [min] şehri Cemâziyelevvel sene 1074. Şuhûdü’l-hâl: Hasan Efendi b. Mehmed, Hüseyin b. Ahmed, Halil b. Ahmed, Cafer b. Abdullah ve gayruhüm.