İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 805 Hüküm no: 1093 Orijinal metin no: [112a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mehmed Beşe ve eşi İsmihan Hâtun’un evlerini Ahmed Çelebi’ye sattıkları Mahmiye-i İstanbul’da kazasker Mehmed Efendi mahallesinde sâkin el-Hâc Mehmed Beşe b. Mustafa kendi tarafından asâleten ve zevcesi İsmihan bt. İbrahim nâm hâtun tarafından husûs-ı âti’l-beyânı ikrâra vekîl olup mezbûrenin verâseti ma‘rifet-i şer‘iyye ile ârifân mahalle-i mezbûre sükkânından Mehmed Beşe b. Abdullah ve Halil Çelebi b. Mahmud şehâdetleri ile şer‘an vekâleti sâbite oldukdan sonra vekâleti meclis-i şer‘-i hatîr-i lâzımü’t-tevkīrde işbu bâ‘isü’l-kitâb fahrü’l-akrân Ahmed Çelebi b. Mehmed mahzarında ikrâr ve takrîr-i kelâm edip zevcem mezbûre İsmihan Hâtun ile ale’l-iştirâki’s-seviy silk-i mülk-i sahîhimizde münselik olup mahalle-i mezbûrede vâki‘ bir tarafı Ali Çelebi mülkü ve bir tarafı Ahmed Çelebi b. Veli mülkü ve bir tarafı diğer Ahmed Çelebi mülkü ve bir tarafı tarîk-i hâs ile mahdûd bir beyt-i süflî ve iki beyt-i ulvî ve bir ahırı ve iki sagīr fevkānî odayı ve bir kenîfi ve muhavvatayı müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müşterî-i merkūm Ahmed Çelebi’ye asâleten ve vekâleten elli beş bin nakid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve kabûl ve kabz ve tesellüm eyledikden sonra semeni olan meblağ-ı mezbûr elli beş bin akçeyi müşterî-i merkūm Ahmed Çelebi yedinden asâleten ve vekâleten ahz u kabz eyledim ba‘de’l-yevm menzil-i mahdûd-ı mezbûr müşterî-i merkūm Ahmed Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâlis min Cemâziyelevvel li sene erba‘a ve seb‘în ve elf. Şuhûdü’l-hâl: Fahrü’l-akrân Çorbacı Mustafa Ağa, Receb Efendi b. Sâdık el-İmâm, Ahmed Çelebi b. Mehmed el-Müezzin, el-Hâc Abdünnebî b. Veli er-Râcil, Mehmed b. Abdullah, Mustafa b. Abdullah ve gayruhüm.