İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 808 Hüküm no: 1097 Orijinal metin no: [112b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı kölenin eski sahibi Zülfikār b. Ali Bey tarafından serbest bırakıldığına şahitlik yapıldığı İşbu bâ‘isü’l-kitâb açık kaşlı elâ gözlü orta boylu sarışın Rusiyyü’l-asl Yusuf b. Abdullah meclis-i şer‘-i hatîr-i lâzımü’t-tevkīrde İsmail Beşe b. Hasan nâm kimesne mahzarında takrîr ve da‘vâ edip ben bundan akdem işbu hâzır bi’l-meclis Zülfikār b. Ali Bey abd-i memlûkü olduğum hâlde beni âzâd eyleyip sâir ahrâr-ı asliyyîn gibi hür olmuşken beni abd-i memlûkü olmak üzre Mustafa nâm kimesne bey‘ edip ol dahi merkūm İsmail Beşe’ye bey‘ eylemeğin mezbûr İsmail Beşe yine rakīk olmak üzre vaz‘-ı yed eder suâl olunup sebîli tahliyye olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Yusuf’dan müdde‘âsını mübeyyin beyyine taleb olundukda udûl-i müslimînden olup mahmiye-i İstanbul’da Manisalı Çelebi mahallesinde sükkânından Mehmed b. Mehmed ve Keçeci Pîrî mahallesinden Mustafa b. Davud meclis-i şer‘-i şerîfe li ecli’ş-şehâde hâzırân olup isre’l-istişhâd fi’l-vâki‘ mezbûr Zülfikār müdde‘î-i mezbûr Yusuf’u bizim huzûrumuzda âzâd eyledim deyû ikrâr ve bizi işhâd eyledi, mezbûr Yusuf ol vakitden beri sâir ahrâr-ı asliyyîn gibi hür olduğuna şâhidleriz [113a] şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle [olmağın], mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene erba‘a ve seb‘în ve elf. Şuhûdü’l-hâl: Ömer Beşe b. Osman, Mehmed Beşe b. Osman, Ahmed b. Ali, Ebûbekir b. Mehmed, Mehmed b. Yusuf.