İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 808 Hüküm no: 1098 Orijinal metin no: [113a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Hoca’nın Sâlih bir kişiye verilmek üzre vakf ettiği evin Şeyh Ahmed Efendi’ye verildiği Dârü’l-hilâfeti’l-aliyye Kostantıniyye el-mahmiyye’de Mesih Paşa mahallesinde vâki‘ olup ashâb-ı hayrâtdan Ali Hoca nâm sâhibü’l-hayr vakf ve süknâsını ulemâdan bir recül-i sâliha şart ve ta‘yîn eylediği lede’l-ahâlî ve’l-cîrân ma‘lûmü’l-hudûd muhterik menzil arsasına tevcîh-i hâkimü’ş-şer‘le mutasarrıf olan Şeyh Mustafa Efendi b. Ömer tarafından husûs-ı âti’l-beyânı ikrâra vekîl olup Mustafa Efendi b. Osman ve Osman Efendi b. Mustafa şehâdetleri ile şer‘an vekâleti sâbite olan eş-Şeyh Ali Efendi b. Ahmed meclis-i şer‘-i hatîr-i lâzımü’t-tevkīrde bâ‘isü hâze’l-kitâb es-Seyyid Şeyh Ahmed Efendi b. Mehmed Efendi tarafından husûs-ı âti’l-beyâna vekîli olan eş-Şeyh Müstakīm Efendi b. Musa mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Şeyh Mustafa Efendi arsa-i merkūme-i mezbûra tevcîh-i hâkimi’ş-şer‘le mutasarrıf iken üzerine menzil binâsına kudreti olmamağla, arsa-i mezbûreyi kendi hüsn-i ihtiyârı ile mûmâ-ileyh es-Seyyid Şeyh Ahmed Efendi’ye ferâğ etmekle hâkim-i muvakki‘-i kitâb tûbâ-lehû ve hüsnü me’âb hazretleri dahi mezbûr es-Seyyid Şeyh Ahmed Efendi’ye tevcîh etmekle mâ vaka‘a bi’t-taleb ketb olundu. Fî evâsıtı min şehri Rebî‘ilâhir sene 1074. Şuhûdü’l-hâl: El-Hâc Ahmed Çelebi b. Mahmud, Mustafa Efendi b. Osman, Şaban Efendi el-İmâm, eş-Şeyh Ali Efendi el-vâ‘iz ve gayruhüm mine’l-huzzâr.