İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 809 Hüküm no: 1100 Orijinal metin no: [113a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâfiye Hanım’ın Rus asıllı cariyesini azat ve bazı eşyalarını hibe ettiği Mahmiye-i İstanbul’da Muhtesib İskender mahallesi sâkinelerinden Sâfiye Hanım bt. Mehmed Ağa mahzarında ikrâr-ı âtîye vekîl olup mezbûreyi ma‘rifet-i şer‘iyye ile ârifân mahalle-i mezbûrede müezzin olan Süleyman Halîfe b. Mustafa ve mahalle-i merkūme sâkinlerinden Murad b. Ali şehâdetleri ile şer‘an vekâleti sâbite olan Mehmed b. Himmet nâm kimesne meclis-i şer‘-i hatîr-i lâzımü’t-tevkīrde işbu bâ‘isetü’l-kitâb açık kaşlı elâ gözlü orta boylu Rusiyyetü’l-asl Muammer b. Abdullah mahzarında ikrâr ve takrîr-i kelâm edip müvekkilem mezbûre Sâfiye Hanım câriye-i memlûkesi mevsûfe-i mezkûre Muammer’i hasbeten lillâhi’l-hallâk tahrîr ve i‘tâk ve sâir harâir-i asliyyât zümresine ilhâk eyledikden sonra eşyâ-i memlûkesinden iki çatma yastık ve bir kebîr minder ve bir mavi velense ve bir Acem kaliçesi ve bir sahan ve bir tencere ve bir orta sini ve bir yemeni yorgan ve bir şamdan ve bir güğüm ve bir yan keçesi merkūme Muammer’e hibe ve teslîm ve temlîk, ol dahi meclis-i hibede ittihâb ve kabz ve kabûl ve temellük eyledi ba‘de’l-yevm mezbûre Muammer sâir ahrâr-ı asliyyât gibi hürre olup müvekkilem merkūme Sâfiye Hanım’ın üzerinde velâ-i şer‘iyyeden gayrı hak ve alâkası kalmayıp eşyâ-i merkūme mülk-i mevbûbu olmuşdur dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâlis min Cemâziyelevvel li sene erba‘a ve seb‘în ve elf. Şuhûdü’l-hâl: Seyyid Mehmed el-İmâm, Oruc Ağa, Mîr Mehmed Ağa, Mehmed b. Ramazan ve gayruhüm