İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 810 Hüküm no: 1101 Orijinal metin no: [113a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimetoka cemâatinden Yakomi v. İlyazer’e borcunu ödemesi için Süleyman Ağa’nın tenbih olunduğu Mahmiye-i İstanbul’da Dimetoka cemâ‘atinden işbu hâmilü’s-sifr Yakomi v. İlyazer nâm yahudi mahfil-i kazâda, Süleyman Ağa b. Mehmed mahzarında üzerine takrîr-i da‘vâ edip mezbûr Süleyman Ağa zimmetinde aded ve vasfı beynimizde ilm-i şer‘î ile ma‘lûme yedimden müşterâ ve makbûz kereste bahâsından otuz bir bin yedi yüz akçe hakkım olup meblağ-ı mezbûrun bi’d-defe‘ât yedi bin akçesini mezkûr Süleyman Ağa’dan ahz u kabz edip yirmi dört bin yedi yüz akçe hakkım bâkī kalmışdi hâlâ meblağ-ı bâkī-i mezbûru mezkûrdan taleb ederin suâl olunsun dedikde gıbbe’s-suâl mezbûr Süleyman Ağa cevâbında kaziyye vech-i meşrûh üzre olup lâkin kabzına mu‘terif olduğu yedi bin akçeden gayrı iki bin akçe dahi müdde‘î-i mezbûra def‘ ve teslîm edip ancak zimmetimde yirmi iki bin yedi yüz akçe bâkī kalmışdır deyû yirmi iki bin yedi yüz akçeyi ikrâr ve iki bin akçeyi def‘le mukābele edicek gıbbe’l-istintâk ve’l-inkâr mezbûr Süleyman Ağa’dan def‘-i mezbûrunu mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olundukdan sonra ikrârı mertebesi olan meblağ-ı mezbûr yirmi iki bin yedi yüz akçeyi müdde‘î-i mezbûre edâya mezbûr Süleyman Ağa’ya tenbîh olunup mâ vaka‘a bi’t-taleb ketb olundu. Fi’l-yevmi’s-sâlis min Cemâziyelevvel li sene erba‘a ve seb‘în ve elf. Şuhûdü’l-hâl: Abdi Çavuş b. [Hüseyin], Mustafa b. İsâ, Şükrullah b. Mustafa, Abdi b. Hüseyin ve gayruhüm.