İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 811 Hüküm no: 1102 Orijinal metin no: [113a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Acem Mehmed b. Ferhad’ın alacak davasında Sefer Efendi ile sulhu kabul ettiği Vilâyet-i Anadolu’da medîne-i Ankara mahallâtından Hacı Arab mahallesinde sâkin Acem Mehmed b. Ferhad meclis-i şer‘de sâbıkan [medîne-i] mezbûra nâib olan fahrü’l-kuzât Sefer Efendi b. Bâli tarafından husûs-ı âti’l-beyâna vekîli olup vekâleti Sâlih b. Şaban ve Oruc b. Sefer nâm kimesneler şehâdetleri ile sâbite olan Hüseyin Efendi b. Ali mahzarında ikrâr edip müvekkil-i mezbûr medîne-i mersûmede nâib iken bi gayri hakkın yüz doksan beş esedî guruşumu ahz u kabz eylemişdi hâlâ taleb ve da‘vâ eylediğimde beynimizde münâza‘ât-ı kesîre vukū‘undan sonra müvekkil-i merkūm Sefer Efendi’ye yirmi yedi bin kıt‘a esedî guruş üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı merkūm yirmi yedi esedî guruşu müvekkil-i mezbûr yedinden tamânen ahz u kabz ve mâ‘adâdan zimmetini ibrâ eyledim min ba‘d husûs-ı mezbûre müte‘allika olan cemî‘ de‘âvîden müvekkil-i mezbûru ibrâ eyledim, min ba‘d husûs-ı mezbûra müte‘allik vechen mine’l-vücûh benim için kıbelinde hak ve alâkam kalmadı dedikde gıbbe’t-tasdîk mâ vaka‘a bi’t-taleb ketb olundu. Hurrire fî târihi’l-mezbûr li’s-seneti’l-merkūm. Şuhûdü’l-hâl: İbrahim b. Veli el-Müezzin, Şâtır Mustafa Bey b. Ömer, el-Hâc Hasan b. Abdullah ve gayruhüm.