İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 822 Hüküm no: 1122 Orijinal metin no: [115b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Sâlih’in çocukları için eski eşi Mehmed b. Derviş’in nafaka vermesine karar verildiği Mahmiye-i İstanbul’da Manisalı Çelebi Mehmed mahallesi sâkinelerinden hâfızatü’l-vesîka Fâtıma bt. Sâlih nâm hâtun meclis-i şer‘de takrîr-i kelâm edip bi hakki’l-hidâne hacr ve terbiyemde olan sagīr oğullarım Eyüb ve Yusuf ve Ramazan’ın nafaka ve kisve ve sâir havâic-i zarûriyyeleri için zevcim mutallıkım babaları Mehmed b. Derviş üzerine kadr-i ma‘rûf nafaka takdîr olunmak matlûbumdur dedikde hâkim-i muvakki‘-i sadr-ı kitâb tûbâ-lehû ve hüsnü me’âb hazretleri sıgār-ı mezbûrûndan her biri için babaları mezbûr Mehmed üzerine yevmî dörder akçeden cem‘an on iki akçe nafaka farz ve takdîr edip vakt-i zarûretde istidâne ve sıgār-ı mezbûrenin nafaka ve kisve ve sâir havâic-i zarûriyyelerine sarfa lede’z-zafer mezbûre Mehmed’e rücû‘a izin vermeğin, mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah Bey [b. Mustafa], Muharrem Çelebi b. ( ), Baba Resûl b. [Rıdvan] ve gayruhüm.