İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 823 Hüküm no: 1123 Orijinal metin no: [115b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dartal v. Terkoy’un Kirkor v. Avanos’daki alacak mes’elesinde sulh yapıldığı Mahmiye-i İstanbul’da Keçeci Pîrî mahallesinde sâkin Mehmed Bey b. Ali meclis-i şer‘de Dartal Papas v. Terkoy nâm Ermeni muvâcehesinde ikrâr ve takrîr-i kelâm edip mezbûr Dartal Ermeni’nin işbu hâzır bi’l-meclis Kirkor v. Avanos zimmetinde cihet-i karz-ı şer‘îden kırk beş bin akçe hakkı olmağla mezbûr Dartal meblağ-ı mezbûr[u] merkūm Kirkor’dan da‘vâ ve taleb ve sulh ve ibrâya beni tarafından vekîl nasb ve ta‘yîn edip ben dahi ba‘de kabûli’l-vekâle meblağ-ı mezbûr kırk beş bin akçeyi mezbûr Kirkor’dan bi’l-vekâle taleb ve da‘vâ eylediğimde ol dahi inkâr etmekle beynimizde münâza‘ât-ı kesîre vukū‘undan sonra vesâtat-ı muslihîn ile beni on bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr on bin akçeyi mezbûr Dartal’a def‘aten edâya iktidârı olmamağla te’cîline tâlib olmağın meblağ-ı mezbûru târih-i kitâbdan her ayda üçer yüz akçe vermek üzre otuz üç aya değin te’cîl eylediğimde meblağ-ı mezbûru mecmû‘u benim malım olmak üzre târih-i kitâb şehrinin beşinci gününde mahmiye-i mezbûrede Davudpaşa mahkemesinde hilâfeten müvellâ olan Mesud Efendi huzûrunda hüccet-i şer‘iyye ettirmişdim. El-hâletü hâzihî hâzır-ı mezkûr Kirkor zimmetinde olan meblağ-ı mezbûr merkūm on bin akçe mezkûr Dartal’ın mülk malı ve hakkıdır, vechen mine’l-vücûh ve sebebin mine’l-esbâb kat‘â alâka ve medhalim yoktur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâbi‘ min Cemâziyelevvel [li sene erba‘a ve seb‘în ve elf]. Şuhûd[ü’l-hâl]: Es-Sâbikūn.