İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 823 Hüküm no: 1124 Orijinal metin no: [115b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Hüseyin’in Abdülkerim Çelebi’deki alacağını vekili Mustafa b. Mirza’nın aldığı ve aksine bir iddiaya kefil olduğu Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘-i mutahhar’dan Mevlânâ Mustafa Efendi b. Mehmed Efendi irsâl olunup ol dahi mahmiye-i İstanbul’da Harâccı Muhyiddin mahallesinde fahrü’l-akrân Süleyman Ağa’nın sâkin olduğu menzile varıp zeyl-i rakīmde muharrerü’l-esâmî olan müslimîn huzûrlarında akd-i meclis-i şer‘-i şerîf eyledikde medîne-i Üsküdar mahallâtından Hüsam Çeşmesi mahallesinde sâkine Havva bt. Hüseyin nâm hâtunun zevci ve tarafından meblağ-ı âti’l-beyânı ahz u kabz ve edâya vekîl olup mezbûrenin zâtını ma‘rifet-i şer‘iyye ile ârifân mezbûr Süleyman Ağa ve el-Hâc Ahmed şehâdetleri ile şer‘an vekâleti sâbite olan Mustafa b. Mirza nâm kimesne meclis-i ma‘kūd-ı mezbûrda işbu bâ‘isü’l-kitâb Abdülkerim Çelebi mahzarında bi’l-vekâle ikrâr ve takrîr-i kelâm edip müvekkilem mezbûre Havva’nın merkūm Abdülkerim Çelebi zimmetinde cihet-i deyn-i şer‘îden altmış kıt‘a riyâlî guruş hakkı olup hâlâ vekâletim hasebiyle meblağ-ı mezbûr altmış riyâlî guruş mezbûr Abdülkerim Çelebi yedinden tamâmen ahz u kabz eyledim dedikde gıbbe’t-tasdîki’ş-şer‘î eğer müvekkilem merkūme Havva benim vekâletimi inkâr edip meblağ-ı mezbûru merkūm Abdülkerim Çelebi’den taleb ve ahz ederse ben zâmin ve kefîl oldum dediğini Mevlânâ-yı mezbûr mahallinde tahrîr, ba‘dehû ma‘an irsâl olunan Hızır b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm Mehmed Efendi, Mustafa Efendi b. ( ), Abdullah Efendi b. ( ), Mehmed Ağa b. Mustafa ve gayruhüm.