İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 824 Hüküm no: 1125 Orijinal metin no: [115b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bedros v. Sefer’in Rus asıllı cariyesini azat ettiği Dârü’l-hilâfeti’l-aliyye Kostantıniyye el-mahmiyye mahallâtından İbrahim Paşa mahallesi sâkinlerinden Bedros v. Sefer nâm zimmî meclis-i şer‘-i hatîr-i lâzımü’t-tevkīrde kendiye rıkkını mu‘terife olan işbu râfi‘atü hâzihi’l-kitâb açık kaşlı sarı elâ gözlü orta boylu Rusiyyetü’l-asl Maroşka bt. Androşka nâm câriye-i memlûkesi muvâcehesinde ikrâr ve takrîr-i kelâm edip mevsûfe-i mezbûre Maroşka’yı lâ li ivazin âcil ve lâ li garazin âcil tahrîr ve i‘tâk ve zümre-i harâir-i asliyyâta ilhâk eyledim ba‘de’l-yevm merkūme Maroşka sâir harâir-i asliyyât gibi hürre olup üzerinde velâ-i şer‘iyyeden gayrı hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Abdi Çelebi b. [Hüseyin], Şükrullah, Mehmed, Ali Çelebi, Nikogos v. İvanos, Ohan v. Kasbar, Harardin v. Mirillit, Abraham v. Burarink ve gayruhüm.