İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 825 Hüküm no: 1126 Orijinal metin no: [116a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs bt. Abdullah’ın eşyalarını torunu Mehmed Çelebi’ye hibe ettiği Mahmiye-i İstanbul’da Tevkī‘î Cafer Çelebi mahallesinde sâkine Belkıs bt. Abdullah nâm hâtun meclis-i şer‘-i şerîfde sadriyye kızı oğlu işbu bâ‘isü’l-kitâb Mehmed Çelebi b. Rıdvan mahzarında bi tav‘ihâ ikrâr ve i‘tirâf edip silk-i mülk-i sahîhimde münselik olan eşyâmdan otuz miskāl altından masnû‘ bir çift bilezik ve bir sîm ön kuşak ve iki beledî döşek ve üç beledî yorgan ve üç tencere ve beş sahan ve bir baklava tepsisi ve iki kilim ve iki minder ve altı beledî yastık ve bir bakraç ve bir demirli sandık ve bir sepet sandığı ve bir mor iskarlet çuha ferâce ve bir alaca kaftan ve bir entari mezbûr Mehmed Çelebi’ye hibe-i sahîha-i şer‘iyye ile hibe ve temlîk ve teslîm ol dahi meclis-i hibede ittihâb ve kabûl ve kabz ve tesellüm eyledi ba‘de’l-yevm üzerimde lâbise olduğum libâsdan gayrı ism-i mal ıtlâk olunur bir şeyim yoktur, cümlesi merkūm Mehmed Çelebi’nin mülk-i mevhûbudur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cemâziyelevvel li sene erba‘a ve seb‘în ve elf. Şuhûdü’l-hâl: Abdullah Efendi b. Mustafa el-İmâm, Hasan Efendi b. Mustafa, el-Hâc Ali b. Hasan, Ali Beşe b. Mustafa, Ali Beşe b. Ahmed, Ali Efendi ve gayruhüm.