İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 825 Hüküm no: 1127 Orijinal metin no: [116a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mehmed’in Rus asıllı cariyesini beş sene hizmet etmek şartıyla azat ettiği Mahmiye-i İstanbul’da Altıpoğaça mahallesinde sâkine Hatîce bt. Mehmed nâm hâtun tarafından tedbîr-i âti’l-beyânı ikrâra vekîl olup mezbûrenin zâtını ma‘rifet-i şer‘iyye ile ârifân olan es-Seyyid Hanefî b. es-Seyyid Zeynelabidin ve Yusuf b. Hasan el-hallâk şehâdetleri ile şer‘an vekâleti sâbite olan zevci Mustafa Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilem mezbûre Hatîce Hâtun’a rıkkını mu‘terife olan açık kaşlı sarı elâ gözlü orta boylu Rusiyyetü’l-asl bâ‘isetü’l-kitâb Ceyhun bt. Abdullah nâm câriye-i memlûkesini, tedbîr-i mutlak ile tedbîr eyleyip lâkin mezbûre Ceyhun dahi beş sene hizmet etmeğe ta‘ahhüd etmeğin müvekkilem dahi beş sene hizmet ederse malımdan âzâd olsun dedi dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sânî min Cemâziyelevvel li sene erba‘a ve seb‘în ve elf. Şuhûdü’l-hâl: Receb Çelebi el-Müezzin, sarrâc Çelebi dellâk, Hüseyin Beşe b. Ahmed, Mehmed b. Ahmed, Mehmed b. Ramazan, Ali Çelebi b. ( ) Eyyûbî ve gayruhüm.