İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 826 Hüküm no: 1128 Orijinal metin no: [116a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçan köle Şâhin b. Abdullah’ın Sivas’da Seydî Beşe’ye teslim edilmesi Dergâh-ı âlî yeniçerilerinin elli üçüncü ağa bölüğü ahâlîsine mahsûs oda ahâlîsinden olup vilâyet-i Anadolu’da medîne-i Sivas sükkânından Seydî Beşe nâm kimesne tarafından husûs-ı âtîye Hasan Beşe b. Kurt ve Yusuf Beşe b. Ali nâm kimesneler şehâdetleri ile sâbitü’l-vekâle vekîl olan Şaban Beşe b. Abdullah meclis-i şer‘-i hatîr-i lâzımü’t-tevkīrde Şaban Kapudân b. el-Hâc Osman mahzarında üzerine takrîr-i da‘vâ edip işbu hâzır bi’l-meclis açık kaşlı gök elâ gözlü orta boylu Şâhin b. Abdullah müvekkilim mezbûr Seydî Beşe’nin mülk ve hakkı iken ibâk edip merkūm Şaban Kapudân yedinde buldum suâl olunup bana teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına mübeyyine beyyine taleb olundukda mumcu Mehmed Beşe b. Abdülkerim ve Bâli Beşe b. İbrahim nâm kimesneler li ecli’ş-şehâde meclis-i şer‘a hâzırân olup istişhâd [olunduklarında], fi’l-vâki‘ işbu hâzır bi’l-meclis merkūm Şâhin mezbûr Seydî Beşe’nin abd-i memlûkü olup mülkünde iken ibâk eylemişdi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mevkūfen ale’l-yemîn mevsûf-ı mezkûr Şâhin’i vekîl-i mezbûr Şaban’a teslîme mesfûr Şaban Kapudân’a tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Hacı Hasan Beşe b. Abdullah, Hüseyin Beşe b. Mehmed el-Mübâşir, Hacı Rüstem Beşe b. Yusuf, Abdi Çelebi b. Hüseyin ve gayruhüm.