İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 827 Hüküm no: 1130 Orijinal metin no: [116a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza Ağa’nın Rus asıllı cariyesini azat ettiği Dârü’l-hilâfeti’l-aliyye Kostantıniyye el-mahmiyye’de Sultan Selim kurbunda Kovacıdede mahallesi sâkinlerinden umdetü’l-emâcid ve’l-a‘yân makbûlü’s-sudûr ve’l-erkân Hamza Ağa meclis-i şer‘-i şerîf-i sâmihu’l-imâd ve mahfil-i dîn-i münîf-i râsihu’l-evtâdda ikrâr ve takrîr-i kelâm edip bana rıkkını mu‘terife olan açık kaşlı elâ gözlü orta boylu Rusiyyetü’l-asl bâ‘isetü hâze’l-kitâb Şahbaz bt. Abdullah nâm câriye-i memlûkemi, hasbeten lillâhi’l-hallâk tahrîr ve i‘tâk ve zümre-i harâir-i asliyyâta ilhâk eyledim ba‘de’l-yevm mezbûre Şahbaz sâir harâir-i asliyyât gibi hürre olup üzerinde velâ-i şer‘îden gayrı hak ve alâkam kalmadı dedikde mâ vaka‘a bi’t-taleb ketb olundu. Hurrire fi’l-yevmi’t-tâsi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Hacı Ahmed b. Mahmud, Mustafa Efendi Keşfî, Abdi Çelebi b. Hüseyin ve gayruhüm.