İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 828 Hüküm no: 1132 Orijinal metin no: [116b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdullah’ın Yusuf Efendi’deki alacağında sulha varıldığı Mahmiye-i İstanbul’da Nahılbend mahallesi sâkinelerinden Sâliha bt. Abdullah nâm hâtun tarafından meblağ-ı âti’z-zikri taleb ve da‘vâ ve lede’l-iktizâ sulh ve ibrâya vekîl olup mezbûreyi ma‘rifet-i şer‘iyye ile ârifân Şaban Efendi b. Hüseyin ve Musa Efendi b. Abdullah şehâdetleri ile şer‘an vekâleti sâbite olan Ali Çelebi b. Mustafa meclis-i şer‘-i hatîr-i lâzımü’t-tevkīrde umdetü’l-a‘yân Yusuf Efendi b. Gāzi nâm kimesne mahzarında ikrâr ve takrîr-i kelâm edip müvekkile-i mezbûre Sâliha i‘mâl ediver deyû kendi malından merkūm Yusuf Efendi’ye bin esedî guruş def‘ ve teslîm ol dahi ahz u kabz etmişdi hâlâ meblağ-ı mezbûru vekâleten merkūm Yusuf Efendi’den taleb ve da‘vâ eylediğimde inkâr etmeğin beynimizde münâza‘ât-ı kesîre ve muhâsamât-ı şedîde vukū‘undan sonra vesâtat-ı muslihîn ile da‘vâ-yı meşrûhadan merkūm Yusuf Efendi beni kırk bin fıddî râyic fi’l-vakt akçe üzerine inşâ-i akd-i sulh eyledikde ben dahi sulh-ı mezbûru vekâleten kabûl ve bedel-i sulh olan meblağ-ı mezbûr kırk bin akçeyi merkūm Yusuf Efendi yedinden tamâmen ahz u kabz eyledim. Husûs-ı mezbûra müte‘allika olan cemî‘ de‘âvî ve mütâlebât ve muhâsamâtdan merkūm Yusuf Efendi’yi ibrâ-i âm ile ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’t-tâsi‘ min şehri Cemâziyelevvel li sene erba‘a ve seb‘în ve elf. Şuhûdü’l-hâl: Eş-Şeyh Ahmed Efendi b. eş-Şeyh İsmail, Ahmed Efendi b. Mehmed, Derviş Ağa b. ( ), el-Hâc Ali b. Musa, Resûl Efendi b. İshak, Mehmed Efendi el-Müezzin, Mustafa Çelebi el-Müezzin.