İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 837 Hüküm no: 1149 Orijinal metin no: [118b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. İbrahim’in Hasan b. Abdullah’da alacağı olduğu iddiasını ispat edemediği Dârü’l-hilâfeti’l-aliyye Kostantıniyye el-mahmiyye hısnı ebvâbından Yenikapı dâhilinde Sîmkeş mahallesi sâkinlerinden Mahmud b. İbrahim nâm kimesne meclis-i şer‘-i hatîrde Hasan b. Abdullah mahzarında üzerine da‘vâ ve takrîr-i kelâm edip merkūm Hasan zimmetinde cihet-i karz-ı şer‘îden sekiz bin akçe hakkım vardır, suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına mübeyyine beyyine taleb olundukda ityân-ı beyyineden izhâr-ı acz edip istihlâf etmeğin merkūm Hasan’a müdde‘î-i mezbûr Mehmed’e üzerine edâsı lâzım sekiz bin akçe deyni olmadığına yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘î-i mezbûr Mehmed bilâ-beyyine mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’t-tâsi‘ min Cemâziyelevvel li sene erba‘a ve seb‘în ve elf. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Şükrullah Bey b. Mustafa, Veli b. Mahmud ve gayruhüm.