İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 844 Hüküm no: 1158 Orijinal metin no: [120a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer b. Turan’ın Müteveffâ Yusuf Ağa b. Mahmud’un tek vârisi olduğunun sabit olduğu Vilâyet-i Anadolu’da Of kazâsına tâbi‘ Kono nâm karye sükkânından işbu râfi‘ü’l-kitâb Ömer b. Turhan dîvân-ı sa‘âdet-makrûnda ma‘kūd olan mahfil-i kazâda, fi’l-asl karye-i mezbûreden olup bundan akdem vefât eden Yusuf Ağa b. Mahmud’un zâhirde vâris-i ma‘rûfu olmamağla cemî‘ terekesi cânib-i beytülmâle âid olmuşdur deyû hâlâ ordu-yı hümâyûnda başdefterdâr olan düstûr-ı mükerrem-i zîşân vezîr-i mükerrem-i âlî-mekân râkib-i huyûlü’l-mecdü ve’l-iclâl sâhib-i zuyûlü’l-izzü ve’l-ikbâl Ahmed Paşa taraf-ı şerîflerinden sâbitü’l-vekâle vekîli ve emr-i şerîf-i cihân-mutâ‘ ile kabza me’mûr olup tereke-i müteveffâ-yı mezbûra vâzı‘u’l-yed olan umdetü ashâbi’l-inşâ ve’l-inşâd zübdetü’l-ekârim ve’l-emcâd Kîsedâr oğlu Ali Efendi b. Ahmed mahzarında üzerine takrîr-i da‘vâ edip ben müteveffâ-yı mezbûr Yusuf Ağa’nın li ebeveyn karındaşı olup babaları Mahmud ve anaları Şâfi nâm hâtun ve maskat-ı re’sleri zikr olunan Kono nâm karye ve müteveffâ-yı mezkûrun verâseti ancak bana münhasıra olup benden gayrı vârisi ve terekesine âhar müstahık yok iken cümle tereke-i müteveffâ-yı mezbûra mezkûr Ali Efendi bi gayri hakkın vaz‘-ı yed [ve] bana teslîm etmez, suâl olunup kasr-ı yed ve bana teslîme mezkûr Ali Efendi’ye tenbîh olunmak matlûbumdur dedikde gıbbe’s-suâl mezkûr Ali Efendi cevâbında tereke-i müteveffâ-yı mezbûra vaz‘-ı yedini ikrâr, lâkin vech-i meşrûh üzre müdde‘î-i mezkûrun verâsetin inkâr edicek müdde‘î-i mezbûrdan verâsetini mübeyyine beyyine taleb olundukda udûl-i müslimînden olup karye-i mezbûre ahâlîsinden olup mahmiye-i İstanbul’da Şehzâde câmi‘-i şerîfi kurbunda sâkin Mustafa Ağa b. Hüseyin ve Sultan Bayezid kurbunda sâkin Osman Ağa b. Ömer Davudpaşa Hânında sâkin İbrahim Ağa b. Kurt nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘î-i mezbûr Ömer müteveffâ-yı mezkûr Yusuf Ağa’nın li ebeveyn karındaşı oğlu ve bi’l-usûbeti’n-nesebiyye vâris olup müdde‘î-i mezbûr Ömer’in babası mezkûr Turhan ile müteveffâ-yı mezkûr Yusuf Ağa li ebeveyn karındaşlar babaları mezbûr Mahmud [120b] ve anaları mezbûre Şâfi Hâtun ve maskat-ı re’sleri karye-i mezbûredir, müteveffâ-yı mezkûrun verâseti ancak müdde‘î-i mezkûr Ömer’e münhasırdır ve bundan gayrı vâris ve terekesine âhar müstahık olduğu ma‘lûmumuz değildir. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’t-tâsi‘ min Cemâziyelevvel li sene erba‘a ve seb‘în ve elf. Şuhûdü’l-hâl: Umdetü’l-izâm ve’l-e‘âlî Receb Efendi b. Himmet, Umdetü erbâbi’t-tahrîr ve’l-kalem Mehmed Efendi Tezkireci-i Mâliye, Ahmed Ağa b. Mehmed, Ali Ağa b. Hüseyin, Ebûbekir Bey b. Bâli, Nasûh Beşe b. İbrahim ve gayruhüm.