İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 845 Hüküm no: 1159 Orijinal metin no: [120b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Beşe b. Mehmed’in vefat eden Şerbetçi Kirkor v. Simavi’de olan alacağının vârislerinden tahsili Tüccâr tâifesinden Receb Beşe b. Mehmed nâm kimesne tarafından meblağ-ı câi’z-zikri da‘vâ ve taleb ve ahz u kabza vekîl olup el-Hâc Kenan b. Abdullah ve Hüseyin Beşe b. Hamza nâm kimesneler şehâdetleri ile şer‘an vekâleti sâbite olan Mehmed Çelebi b. Muharrem nâm kimesne meclis-i şer‘-i hatîr-i lâzımü’t-tevkîrde Mahmiye-i İstanbul’da Tahtakale kurbunda Şerbetçi iken bundan akdem hâlik olan Kirkor v. Simavi nâm zimmînin verâseti zevce-i metrûkesi Gül bt. Bedros’a ve sulbî kebîr oğulları İstakız ve Simavi ve sulbî sagīr oğulları Serkis ve Karabet ve Dago’ya münhasıra olduğu şer‘an zâhir ve müte‘ayyin oldukdan sonra hâlik-i mezbûrun terekesine vâzı‘u’l-yed olan mezbûrân İstakız ve Simavi muvâcehelerinde üzerlerine bi’l-vekâle da‘vâ ve takrîr-i kelâm edip müvekkilim merkūm Receb Beşe’nin hâlik-i merkūm zimmetinde yedine müşterâ ve makbûz [ve] vezni beynlerinde ilm-i şer‘î ile ma‘lûm siyah üzüm semeninden yüz yirmi bin akçe hakkı olup hattâ hâlik-i merkūm hayâtında müvekkilem merkūme vech-i muharrer üzre siyah üzüm semeninden yüz yirmi bin akçe deyni olduğunu huzûr-ı müslimînde kirâren ve mirâren ikrâr eyledikden sonra meblağ-ı mezbûru kable’l-edâ hâlik olmağla zimmetinde kalmışdır hâlâ tereke-i vâfiyyesine vâzı‘u’l-yed olan mezbûrândan bi’l-vekâle taleb ederim, suâl olunsun dedikde gıbbe’s-suâl ve’l-inkâr vekîl-i mezbûr Mehmed Çelebi’den müdde‘âsını mübeyyin beyyine taleb olundukda udûl-i ricâlden olup mahmiye-i mezbûrede Tahtakale kurbunda Çörekçi tâifesinden Ali Çelebi b. Mustafa ve Mehmed Çelebi b. Kenan ve Hüseyin Beşe b. Ahmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında, fi’l-vâki‘ hâlik-i mezbûr Kirkor hayâtında zikr olunan siyah üzüm semeninden müvekkil-i merkūm Receb Beşe’ye zimmetimde yüz yirmi bin akçe deynim vardır deyû ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti’ş-şerâiti’l-kabûl şehâdetleri makbûle oldukdan sonra merkūm Ali için meblağ-ı mezbûru hâlik-i merkūmun terekesinden vekîl-i mezbûr Mehmed Çelebi’ye edâya merkūmân İstakız ve Simavi’ye tenbîh birle mâ vaka‘a bi’t-taleb ketb olundu. Fi’l-yevmi’l-âşir min Cemâziyelevvel li sene erba‘a ve seb‘în ve elf. Şuhûdü’l-hâl: Ahmed Çelebi b. Mahmud, Abdi Çelebi b. Receb, Şükrullah b. Mustafa, Muharrem Çelebi b. Abdullah Çelebi, Mehmed Çelebi b. Abdullah, Ahmed b. Abdülcebbar ve gayruhüm.