İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 846 Hüküm no: 1160 Orijinal metin no: [120b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin’in terekesi için vasiyeti Husûs-ı âti’l-beyânın mahallinde tahrîri için gıbbe’l-iltimâs kıbel-i şer‘-i mutahhardan Mehmed Efendi b. Ahmed irsâl olunup ol dahi mahmiye-i İstanbul’da Şeyh Muhyiddin mahallesinde Fâtıma bt. Hüseyin nâm hâtunun sâkine olduğu menzile varıp zeyl-i kitâbda mastûrü’l-esâmî olan müslimîn huzûrlarında akd-i meclis-i şer‘-i şerîf eyledikde mezkûre Fâtıma Hâtun, Mehmed Efendi b. Abdüssettâr el-imâm ve Hasan Hoca b. Mustafa ta‘rîfleri ile zâtı mu‘arrefe oldukdan sonra meclis-i ma‘kūd-ı mezbûrda el-Hâc Mustafa b. Abdullah mahzarında takrîr-i kelâm edip bi emrillâhi te‘âlâ dâr-ı fenâdan dâr-ı bekāya intikāl eylediğimde cemî‘ malımın sülüsü ihrâc olunup techîz ve tekfîn ve levâzım-ı defin ve sâir vücûh-ı hayrâta harc u sarf olunup bâkīsi li eb kız karındaşım oğlu olup zî-rahm cihetinden hasren vârisim olan Hüseyin Ağa b. Ahmed Ağa’ya irsâl ve îsâl oluna deyû vasiyyet ve bu vesâyâmı tenfîze mezbûr el-Hâc Mustafa’yı vasiyy-i muhtâr nasb ve ta‘yîn eyledim dedikde mezbûr el-Hâc Mustafa dahi vesâyet-i merkūmeyi kabûl ve hizmet-i lâzımesini edâya ta‘ahhüd eylediğini Mevlânâ-yı mezbûr mahallinde tahrîr ve ba‘dehû meclis-i şer‘a gelip ma‘an irsâl olunan Mehmed b. Abdullah alâ vukū‘ihi ihbâr ve takrîr etmeğin mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Fahrü’l-eimme es-Seyyid Lütfullah Çelebi el-İmâm, Dilaver Hoca b. Abdullah el-Müezzin, Abdurrahman Dede b. Nasûh, İvaz Çelebi b. Halil, Mehmed Çelebi b. Mahmud ve gayruhüm.