İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 850 Hüküm no: 1166 Orijinal metin no: [121b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Kerime bt. Hasan’ın eşi Mustafa’nın, Ayşe bt. Mustafa aleyhindeki alacak davasından menedildiği Mahmiye-i İstanbul’da Kâtib Mustafa mahallesinde sâkine iken bundan akdem vefât eden Kerime bt. Hasan nâm hâtunun verâseti, zevci Mustafa ile li ebeveyn kız karındaşı Fâtıma’nın oğlu diğer Mustafa b. Memişah nâm kimesneye münhasıra olduğu şer‘an zâhir ve müte‘ayyin oldukdan sonra müteveffât-ı mezbûrenin zevci merkūm Mustafa Meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ayşe bt. Mustafa nâm hâtun mahzarında üzerine da‘vâ ve takrîr-i kelâm edip mezkûre Ayşe müteveffât-ı mezbûre Kerime’ye hâl-i marazında mecnûne ve mu‘tekide olan diğer câriye-i memlûkesi olan Gülistan nâm câriyesini ve bir altın bileziğin kendiye vasiyyet eylemiş deyû fuzûlen ahz etmişdir. İhkāk-ı hak olunmasın taleb ederim, suâl olunsun dedikde gıbbe’s-suâl mezbûre Ayşe cevâbında müdde‘î-i merkūm Mustafa zikr olunan bileziği ve câriyeyi târih-i kitâbdan iki ay mukaddem benden taleb ve da‘vâ eyledikde vesâtat-ı muslihîn ile mezbûre Mustafa’yı iki bin akçe üzerine inşâ-i akd-i sulh eyledikde ol dahi sulh-ı mezbûru kabûl ve bedel-i sulh olan meblağ-ı mezbûru yedinden ahz u kabz eyledi deyû def‘le mukābele edicek gıbbe’l-istintâk ve’l-inkâr merkūme Ayşe’den def‘-i mezbûrunu mübeyyine beyyine taleb olundukda udûl-i müslimînden olup mahalle-i mezbûrede İmâm olan Ömer Efendi b. İsâ ve Hasan Çelebi b. İbrahim nâm kimesneler li ecli’ş-şehâde meclis-i şer‘a hâzırân olup istişhâd olunduklarında, fi’l-vâki‘ mezbûr Mustafa târih-i kitâbdan iki ay mukaddem mezbûre Ayşe’den bir altın bilezik ve Gülistan nâm câriye da‘vâ ve taleb eyledikde vesâtat-ı muslihîn ile mezkûre Ayşe müdde‘î-i mezbûr Mustafa hissesinden bizim huzûrumuzda iki bin akçe üzerine inşâ-i akd-i sulh edip ol dahi sulh-ı mezbûru kabûl ve bedel-i sulh olan meblağ-ı mezbûr iki bin akçeyi mezkûre Ayşe yedinden bi’t-tamâm ahz u kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i merkūm Mustafa bî-vech mu‘ârazadan men birle mâ, vaka‘a bi’t-taleb ketb olundu. Fi’l-yevm ( ) min Cemâziyelevvel li sene 1071. Şuhûdü’l-hâl: Molla Ahmed b. el-Müezzin, mumcu Mustafa Çelebi, el-Hâc Ali b. Abdullah, Veli b. Mahmud, Mehmed b. Ramazan, ve gayruhüm.