İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 851 Hüküm no: 1167 Orijinal metin no: [121b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Yani’nin vârislerinden Manol ve Oroka bt. Toroham’ın Nikola v. Pireşkova aleyhindeki alacak davalarında haksız oldukları Mahmiye-i İstanbul’da Ali Paşa-yı Atîk mahallesinde sâkin iken bundan akdem hâlik olan Yani nâm zimmînin bi’l-inhisâr vârisleri olup kendi nefsinden asâleten ve hâlik-i mezbûrun sulbî oğlu Manol nâm sagīrin kıbel-i şer‘den mansûbe vasîsi olan zevce-i metrûkesi Oroka bt. Toroham nâm nasrâniyye mahfil-i kazâda, işbu râfi‘ü’s-sifr Nikola v. Pireşkov[a] nâm zimmî muvâcehesinde üzerine takrîr-i da‘vâ edip merhûme Kepenekçi Sinan vakfından olup mahalle-i mezbûrede vâki‘ lede’l-ahâlî ma‘lûmü’l-hudûd vakıf menzil icâre-i mu‘accele-i ma‘lûme ve ayda yirmi beş akçe ücret-i müeccele ile hâlik-i merkūmun hayâtında taht-ı tasarrufunda iken mezbûr Nikola’ya izn-i mütevellî-i vakf-ı mezbûr ile menzil-i mezbûru on bin akçe bedel mukābelesinde ferâğ ve tefvîz ve teslîm edip bedel-i mezkûrun dört bin akçesine hayâtında kabz edip altı bin akçeyi ahz etmeden hâlik olmağın irsen bize isâbet ve intikāl etmişdir hâlâ meblağ-ı mezbûru asâleten ve vesâyeten [taleb ederim dedikde], merkūm Nikola cevâbında kaziyye vech-i muharrer üzre olup lâkin müdde‘î-i mezkûr on bin akçeyi hâlik-i mesfûr Yani’ye hayâtında tamâmen def‘ ve teslîm ol dahi ahz u kabz edip meblağ-ı mezbûr mütâlebesinden zimmetim berî olmuşdur deyû def‘le mukābele edicek gıbbe’l-istintâk ve’l-inkâr mezkûr Nikola’dan def‘-i mezbûrunu mübeyyine beyyine taleb olundukda mahalle-i mezbûre sükkânından Todoş v. Pireşkova ve Yakomi v. Yorgi ve Kolosi v. Atanaş nâm zimmîler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezkûr Nikola bizim huzûrumuzda beheri merkūm on bin akçeyi hâlik-i mezbûr Yani’ye hayâtında ve kemâl-i akl u sıhhatinde def‘ ve teslîm edip mezbûr Yani tamânen ahz u kabz edip biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm mâ vaka‘a bi’t-talebketb olundu. Fi’l-yevmi’r-râbi‘ aşer min Cemâziyelevvel li sene 1074. Şuhûdü’l-hâl: El-Hâc Ahmed b. Mahmud, Abdi Çelebi b. Hüseyin, Şükrullah b. Mustafa ve gayruhüm.