İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 852 Hüküm no: 1168 Orijinal metin no: [122a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed ve Mahmud b. Hasan’ın menzil ve arsasını Ali b. Mehmed ile eşi Meryem bt. Mehmed’e sattıkları Mahmiye-i İstanbul’da Sultan Selim Hân -aleyhi’r-rahmeti ve’l-gufrân- câmi‘-i şerîfi kurbunda Çukurbostan mahallesi sükkânından Ahmed ve Mahmud b. Hasan nâm kimesneler meclis-i şer‘de işbu bâ‘isü’l-vesîka Ali b. Mehmed ile zevcesi Meryem bt. Mehmed mahzarlarında ikrâr ve takrîr-i kelâm edip arsasının merhûm eş-Şeyh Yavsi vakfına senede seksen akçe mukāta‘a-i kadîmesi olup mahalle-i mezbûrede vâki‘ bir tarafı Ahmed b. Mehmed tasarrufunda olan menzile ve bir tarafı Haffâf Veli tasarrufunda olan menzile ve bir tarafı zikr olunan bostana ve bir tarafı tarîk-i hâssa müntehî iki bâb fevkānî oda ve tahtında ahır ve havlu ve su kuyusunu ve kenîfi ve bahçeyi müştemil olup babamız merkūm Hasan’dan ikimize iştirâken intikāl eden ebniye-i memlûkemizi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūmân Ali ile Meryem’e yirmi bir bin iki yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi vech-i muharrer üzre iştirâ ve kabûl ve kabz ve tesellüm eylediklerinden sonra semeni olan meblağ-ı mezbûr yirmi bir bin iki yüz akçeyi merkūmân Ali ve Meryem yedlerinden tamâmen ahz u kabz ettikden sonra arsasına dahi ma‘rifet-i mütevellî-i vakf-ı mezbûr ile ferâğ ve tefvîz, anlar dahi tefevvüz ve kabûl eylediler ba‘de’l-yevm ebniye-i merkūme mersûmânın mülk-i müşterâları ve arsa-i mezbûre hakk-ı müfevvazları olmuşdur keyfe mâ yeşâ’ ve yahtâr mutasarrıf olsunlar dediklerinde, gıbbe’t-tesâdukı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cemâziyelevvel li sene erba‘a ve seb‘în ve elf. Şuhûdü’l-hâl: Receb Çelebi b. Süleyman, Ali Efendi b. Mehmed el-İmâm, İbrahim Çelebi b. Mehmed, Mehmed Çelebi b. Halil, Bayram b. Mustafa ve gayruhüm.