İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 857 Hüküm no: 1175 Orijinal metin no: [123a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgaki v. Dimitraşko’nun vefat eden el-Hâc Kasım Ağa b. Abdülmennân’daki alacağı Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘-i mutahhardan Mevlânâ Ömer Efendi b. İsmail irsâl olunup ol dahi mahmiye-i İstanbul’da Nişancı Cafer Çelebi mahallesi sâkinlerinden Yorgaki v. Dimitraşko nâm zimmînin menziline varıp zeyl-i kitâbda mastûrü’l-esâmî olan müslimîn mahzarlarında akd-i meclis-i şer‘-i mübîn eyledikde mezbûr Yorgaki meclis-i ma‘kūd-ı mezbûrda mahmiye-i mezbûrede Şîrmerd Çavuş mahallesi sâkinlerinden sâbıkan sekbanbaşı iken fevt olan el-Hâc Kasım Ağa b. Abdülmennân’ın verâseti, zevce-i metrûkesi Ümmühânî Hâtun ile sulbiye kebîre kızları Fahri Hâtun ve sulbiye sagīre kızı Afife Hâtun’a münhasıra olduğu mütehakkik oldukdan sonra sagīre-i mezbûrenin kıbel-i şer‘den mansûbe vasîsi olan vâlidesi mezbûre Ümmühânî Hâtun ile mezbûre Fahri Hâtun taraflarından husûs-ı âtîye vekîl olup vekâleti mezbûretân Ümmühânî ve Fahri Hâtun’un zâtları ma‘rifet-i şer‘iyye ile ârifân olan el-Hâc Handan b. Abdülmennân ve Ahmed Beşe b. Abdullah şehâdetleri ile sâbite olan merkūme Fahri Hâtun’un zevci Ali Ağa b. Abdurrahman mahzarında takrîr-i kelâm edip merhûm-ı merkūm el-Hâc Kasım Ağa zimmetinde deyn-i şer‘îden iki bin guruş hakkım olup bin guruşuna müteveffâ-yı mezbûr el-Hâc Kasım Ağa’nın hâl-i hayâtında yedinden ahz u kabz edip bin guruşu zimmetinde hakkım kalıp hattâ meblağ-ı mezbûr bana deyni olduğuna alâ ruûsi’l-işhâd ikrâr ettikden sonra zimmetinde iken vefât etmişdir hâlâ suâl olunup tereke-i vâfiyyesinden alıverilmek matlûbumdur dedikde gıbbe’s-suâl ve’l-inkâr müdde‘î-i mezbûr Yorgaki’den müdde‘âsını mübeyyine beyyine taleb olundukda mahmiye-i mezbûre hısn-ı ebvâbından Fenerkapısı kurbunda Tahtaminâre mahallesi sâkinlerinden Yazıcı Hüseyin Çelebi b. Mahmud ve Sarı Musa mahallesi sâkinlerinden Ahmed Beşe b. Abdülmennân nâm kimesneler li ecli’ş-şehâde meclis-i ma‘kūd-ı mezbûra hâzırân olup istişhâd olunduklarında, fi’l-hakīka merhûm-ı merkūm el-Hâc Kasım Ağa hâl-i hayâtında müdde‘î-i mezbûr Yorgaki’ye deyn-i şer‘îden iki bin guruş deyni olup bin guruşunu teslîm edip bin guruş elân zimmetimde mezkûr Yorgaki’ye deynim bâkī kalmışdır deyû huzûrumuzda ikrâr eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra meblağ-ı mezbûru küllen ve ba‘zan ahz u istîfâ ve havâle ve hibe ve turuk-ı şer‘iyyeden bir tarîk ile müteveffâ-yı mezbûrun zimmetini ibrâ eylemediğine merkūm Yorgaki’ye yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle ba‘de’l-hükm vâki‘ hâli Mevlânâ-yı mezbûr mahallinde ba‘de’t-tahrîr ma‘an ba‘s olunan Abdi Çelebi b. Hüseyin ve Nasûh Bey b. Yusuf ile meclis-i şer‘-i hatîre gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis aşer min Cemâziyelevvel li sene erba‘a ve seb‘în ve elf. Şuhûdü’l-hâl: Çorbacı İsâ Ağa b. Mehmed, Mehmed Ağa b. Hasan, İbrahim Efendi b. Mehmed, el-Hâc Ali b. Mustafa, Mustafa Beşe b. Mehmed ve gayruhüm.