İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 860 Hüküm no: 1180 Orijinal metin no: [123b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hüseyin’in çiftlik ve müştemilatını Muammer Hâtun bt. Abdullah’a sattığı Mahmiye-i İstanbul’da Âşık Paşa mahallesi sâkinlerinden Mehmed Ağa b. Hüseyin nâm kimesne meclis-i şer‘-i hatîr-i lâzımü’t-tevkīrde işbu sâhibetü’l-kitâb Muammer Hâtun bt. Abdullah mahzarında ikrâr ve takrîr-i kelâm edip Büyükçekmece müzâfâtından Ömerli nâm karyede vâki‘ bir tarafdan ( ) bağı ve bir tarafdan hark-ı şehîr ve bir tarafdan Veli Beşe b. ( ) tarlası ve bir tarafdan tarîk-i âm ile mahdûd fevkānî ve tahtânî iki bâb odaları ve bir kiler ve ahırı ve tahmînen bir dönüm bağı ve zât-ı eşcâr-ı müsmire ve gayr-ı müsmire-i muhavvatayı müştemil çiftlik ta‘bîr olunur menzilimi, cemî‘ tevâbi‘ ve levâhıkı ve çiftlik-i mezbûrun içinde olan on iki re’s hayvanât ve beynimizde ilm-i şer‘î ile ma‘lûme âlât-ı zirâ‘at ve hırâset ile otuz bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra yine çiftlik-i merkūm ile tasarruf olunur ınde’l-ahâlî ve’l-cîrân ma‘lûmü’l-hudûd ve’l-kat‘ çayır ve tarlaların hakk-ı tasarruflarına ma‘rifet-i sâhib-i arz ile on bin akçe bedel mukābelesinde mezbûre Muammer Hâtun’a ferâğ ve tefvîz edip ol dahi tefevvüz ve kabûl eyledikden sonra semen-i merkūm otuz bin akçe ile bedel-i tefvîz-i mezbûr on bin akçe ki cem‘an kırk bin akçemi mezbûre Muammer Hâtun yedinden bi’t-tamâm ahz u kabz eyledim ba‘de’l-yevm çiftlik-i mezbûr ve içinde olan eşyânın cümlesi mülkü ve çiftlik-i merkūm ile tasarruf olunur cümle çayır ve tarlalar dâhil-i havza-i tasarrufu olsun dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’t-tâsi‘ aşer min Cemâziyelevvel sene 1074. Şuhûdü’l-hâl: Halil Beşe er-Râcil, Mehmed Kethüdâ b. ( ), Abdüllatif b. ( ), Mehmed Çelebi b. Mustafa, Ali Beşe er-Râcil ve gayruhüm.