İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 861 Hüküm no: 1181 Orijinal metin no: [123b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Yorgi v. Yani’nin vârisleri eşi Aleksandra ile oğlu Todori’nin tereke taksimi hususunda birbirleriyle anlaştıkları Mahrûse-i Galata a‘mâlinden Arnavud köyü demekle ma‘rûfe karye sükkânından iken bundan akdem hâlik olan Yorgi v. Yani nâm zimmînin verâseti, zevce-i metrûkesi Aleksandra bt. Yani’ye ve sulbî oğlu Todori’ye münhasıra olup kable’l-kısmet mezbûr Todori dahi hâlik olup verâseti vâlidesi mezkûre Aleksandra’ya ve li ebeveyn ibn-i ammi ve bi’l-usûbeti’n-nesebiyye vârisi olan Yani v. Pavlo’ya münhasıra olduğu şer‘an mütehakkik oldukdan sonra mezkûre Aleksandra meclis-i şer‘-i hatîrde mezkûr Yani muvâcehesinde ikrâr ve i‘tirâf edip hâlik-i evvel mezkûr Yorgi’nin terekesinden olup karye-i mezbûrede Yenimahalle’de vâki‘ bir tarafı Posteri Reis mülküne ve bir tarafı Aslan menziline ve bir tarafı Yorgi menziline ve bir tarafı tarîk-i âma müntehî fevkānî iki oda ve iki sofa ve kenîf ve altında bir kiler ve kebîr mahzen ve havluyu müştemil mülk menzil ve yine hâlik-i mezbûr Yorgi’nin terekesinden olup karye-i mezbûre bağları hilâlinde Fundalık demekle ma‘rûf mevzi‘de vâki‘ bir tarafı Manol bağına ve bir tarafı Kostantin bağına ve bir tarafı tarîk-i âma müntehî beş dönüm bir kıt‘a mülk bağ, bi hükmi’l-münâsahati’ş-şer‘iyye yirmi dört sehim olup on sehimi bana ve on dört sehimi mezkûr Yani’ye isâbet eylediği ecilden rızâmız ile beynimizde iktisâm eylediğimizde, menzil-i mahdûd-ı mezkûrun nısf-ı şâyi‘i ve zikr olunan mecmû‘ bağ on dört sehim hissesi mukābelesinde mezkûr Yani’ye teslîm ol dahi ahz u kabz edip lâkin hisse-i meşrûhasından ziyâde olmağın mezbûr Yani kendi malından benim hissemi tekmîl için bana iki bin akçe verip ben dahi vech-i muharrer üzre ahz u kabz eyledim ba‘de’l-yevm [124a] sâlifü’z-zikr menzil-i mahdûdun nısf-ı şâyi‘i ve mecmû‘-ı bağ, işbu Yani’nin mülk-i mevrûsudur. Vechen mine’l-vücûh ve sebebin mine’l-esbâb benim için hak ve alâka kalmadı ba‘de’l-yevm hâlik-i mezbûrun gerek zâhir ve gerek hafî cemî‘ terekesine müte‘allik cemî‘ de‘âvîden mezbûru ibrâ-i âm ile ibrâ eyledim dedikde mezbûr Yani ben dahi menzil-i mahdûd-ı mezkûrun nısf-ı şâyi‘-i âharını mezkûre Aleksandra’nın on sehim hissesi mukābelesinde teslîm ve ikbâz etmişimdir. Min ba‘d mahdûd-ı mezkûrun nısf-ı şâyi‘-i âharı mülk-i mevrûsudur. Vechen mine’l-vücûh ve sebebin mine’l-esbâb benim için hak ve alâka kalmadı ba‘de’l-yevm hâlik-i mezbûrun nukūd ve menkūl ve esâs-ı beyt ve evânî-i nühâsiyye ve gayr-ı nühâsiyye ve bi’l-cümle ism-i mal ıtlâk olunur gerek zâhir ve gerek hafî cemî‘ terekesine müte‘allika olan cemî‘ de‘âvî ve mütâlebât ve eymân ve muhâsamâtdan mezkûre Aleksandra’yı ibrâ-i âm ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min Cemâziyelevvel sene 1074. Şuhûdü’l-hâl: Mustafa Çavuş el-Mübâşir, Şükrullah b. Mustafa, Abdurrahman Çelebi b. Bâli, Mahmud b. Ali, Mehmed Beşe b. Ali, İlyas Beşe b. Ali ve gayruhüm.