İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 862 Hüküm no: 1182 Orijinal metin no: [124a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sitti Hâtun bt. Nuh Efendi’nin Şeyh Mehmed’den boşandığı Dârü’l-hilâfeti’l-aliyye Kostantıniyye el-mahmiyye’de Kirmasti mahallesinde sâkine umdetü’l-muhadderât tâcü’l-mestûrât Sitti Hâtun bt. el-müvellâ el-merhûm Nuh Efendi tarafından zikri âtî hul‘ ve ibrâya ve meblağ-ı âtîyi ahz u kabz ve kendiye îsâle vekîl olup vekâlet-i mûmâ-ileyhâyı ma‘rifet-i şer‘iyye ile ârifân olan dâmâd-ı mükerremleri umdetü’l-a‘yân makbûlü’s-sadr ve’l-erkân Mehmed Bey b. Murtaza Paşa ve umdetü’l-kuzâti’l-İslâm Ahmed Efendi b. Osman nâm kimesne şehâdetleri ile vekâleti sâbite olan fahrü’l-a‘yân Ahmed Çelebi b. Ferruh meclis-i şer‘-i hatîrde müvekkile-i mûmâ-ileyhânın zevc-i mükerremleri olup sâbıkan Anadolu kazaskeri olup hâlâ Mısr-ı Kahire’de mutavattın olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în hallâlü ef‘âli’l-müşkilât, keşşâfu gavâmızi’l-mu‘zilât Hasan Efendizâde Şeyh Mehmed Efendi hazretleri tarafından husûs-ı âtî ve ibrâya vekîl olduğunu hâkim-i muvakki‘-i [sadr-ı] kitâb tûbâ-lehû ve hüsnü me’âb Efendi hazretleri huzûrunda şuhûd-ı udûlle isbât edip vekâletine hükm olunan Yusuf Çelebi b. Abdülmennân mahzarında ikrâr ve i‘tirâf edip müvekkile-i mûmâ-ileyhânın müvekkili mûmâ-ileyh Şeyh Mehmed Efendi hazretleri zimmetinde mütekarrir ve ma‘kūdun-aleyh olan bin altın mehr-i müeccel-i müsemmâsının bin sekiz yüz kıt‘a esedî guruşunu vekîl-i mezbûr yedinden meclis-i şer‘de vekâleten ahz u kabz edip mâ‘adâsı ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı kendi üzerine olmak üzre vekâlet-i mahkiyyem hasebiyle vekîl-i mezbûr Yusuf Çelebi ile muhâla‘a-i sahîha-i şer‘iyye ile muhâla‘a edip mezbûr Yusuf Çelebi dahi hul‘-ı mezbûru kabûl eyledikden sonra zevciyyete ve sâir husûslara müte‘allika olan cemî‘ de‘âvî ve mütâlebât ve eymân ve muhâsamâtdan müvekkil-i mûmâ-ileyh Şeyh Mehmed Efendi hazretlerini ibrâ-i âm ile ibrâ eyledim dedikde vekîl-i mezbûr Yusuf Çelebi müvekkilim mûmâ-ileyh Şeyh Mehmed Efendi’nin eşyâ-i memlûkesinden müvekkile-i mezbûre Sitti Hâtun yedinde emânet olan lahana rengi çukaya kaplı bir sırt samur kürk, bir sâ‘at, bir beyaz sofa kaplı bir sırt samur kürkü meclis-i şer‘de vekîl-i mezbûr Ahmed Çelebi yedinden ahz u kabz edip min ba‘d zevciyyete ve sâir husûslara müte‘allika olan cemî‘ de‘âvî ve mütâlebât ve eymân ve muhâsamâtdan müvekkile-i mezbûre Sitti Hâtun’u vekâlet-i mahkiyyem hasebiyle ibrâ-i âm ile ibrâ ve iskāt eyledim dedikde gıbbe’t-tesâdukı’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Cemâziyelevvel sene erba‘a ve seb‘în ve elf. Şuhûdü’l-hâl: A‘lemü’l-ulemâ’i’l-izâm efdalü’l-fuzalâ’i’l-fihâm Ahmed Efendi b. el-mevlâ el-merhûm Abdurrahman Efendi, Umdetü’l-mevâliyyü’l-kirâm İlâhîzâde Mehmed Efendi, Kıdvetü’l-mevâliyyü’l-izâm Ahmed Efendi b. ( ), Fahrü’l-müderrisîni’l-kirâm Nâzikîzâde Mustafa Efendi, Fahrü’l-müderrisîn Antakyalı Mustafa Efendi, Fahrü’l-müderrisîn es-Seyyid Mehmed Efendi b. es-Seyyid İbrahim, Gekvizeli Mehmed Çelebi b. Mehmed, İbrahim Çelebi b. Halil, Eyüb Çelebi b. Resûl ve gayruhüm.