İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 863 Hüküm no: 1183 Orijinal metin no: [124a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Receb’in, Mustafa aleyhine açtığı dükkan davasından menedildiği Mahmiye-i İstanbul’da Altıpoğaça mahallesi sâkinelerinden Râbia bt. Receb nâm hâtun mahfil-i kazâda, merhûme Ayşe Hâtun vakfına hâlâ mütevellî olan Ramazan b. Musa huzûrunda zikri âtî dükkâna vâzı‘u’l-yed olan işbu râfi‘ü’l-kitâb Mustafa mahzarında üzerine takrîr-i da‘vâ edip merhûme Ayşe Hâtun vakfından mahmiye-i mezbûrede Müftü Ali Çelebi Hamamı kurbunda vâki‘ ma‘lûmü’l-hudûd dükkân ale’l-iştirâki’s-seviyy mahalle-i mezbûrede sâkin iken bundan akdem vefât eden karındaşım Mustafa hâl-i hayâtında dükkân-ı mezbûrun nısfını ve benim haberim yok iken zevcesi işbu hâzıre bi’l-meclis Râbia bt. Abdullah’ın ismi benim ismime muvâfık olmağla nısf-ı şâyi‘-i âharını mezbûre Râbia merkūm Mustafa’ya izn-i mütevellî ile fâriğler olmuşlar. Ol vechile dükkân-ı mezbûrun nısf-ı şâyi‘ine mezbûr Mustafa bi gayri hakkın vaz‘-ı yed eder, suâl olunup kasr-ı yedine ve teslîme tenbîh olunmak matlûbumdur dedikde gıbbe’s-suâl mezbûr Mustafa cevâbında dükkân-ı mezbûrun nısf-ı şâyi‘i merkūm Mustafa’nın tasarrufunda olup ve nısf-ı âharı zevcesi işbu hâzıre bi’l-meclis Râbia’nın tasarrufunda olup hattâ vech-i muharrer üzre hakk-ı tasarruflarını izn-i mütevellî-i vakf-ı mezbûr ile târih-i kitâbdan mukaddem bana fâriğler olup mütevellîden temessük alıvermişlerdir deyû dükkân-ı mezbûrun nısf-ı şâyi‘i ücreteyn-i ma‘lûmeteyn ile müdde‘iyye-i mezbûrenin tasarrufunda olduğunu inkâr edicek müdde‘iyye-i mezbûreden müdde‘âsını mübeyyine beyyine taleb olundukda beyyinem olmayıp bir vechile isbâta kudretim yoktur deyice, tesbîten li’l-asl mezbûr Mustafa’dan sıdk-ı makāline beyyine taleb olundukda udûl-i müslimînden olup mahalle-i mezbûre sükkânından Receb b. Hüseyin ve Hüseyin b. Ali nâm kimesneler li ecli’ş-şehâde meclis-i şer‘a hâzırân olup istişhâd olundukda fi’l-hakīka dükkân-ı mesfûr icâre-i mu‘accele ve müeccele ile müteveffâ-yı mezbûr Mustafa ile zevcesi Râbia bt. Abdullah’ın ale’l-iştirâki’s-seviy taht-ı tasarruflarında olup temessükde muharrer ve mastûr olan Râbia, müteveffâ-yı mezbûrun zevcesi olan işbu Râbia’dır. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘iyye-i merkūme Râbia bî-vech mu‘ârazadan men‘ olunup mâ vaka‘a bi’t-taleb ketb olundu. Fî evâili Cemâziyelevvel li sene erba‘a ve seb‘în ve elf. Şuhûdü’l-hâl: Mustafa Efendi Reisülküttâb, Ömer Efendi b. İsmail, Hatîbzâde Mehmed Efendi, Keşfî Mustafa Efendi b. Muharrem, Abdi Çelebi b. Hüseyin, Şükrullah Bey b. Mustafa.