İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 864 Hüküm no: 1184 Orijinal metin no: [124b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Paşmakçızâde Mehmed Efendi b. Mehmed’in vakıftan borç aldığı Husûs-ı âti’l-beyânın mahallinde tahrîri için gıbbe’l-iltimâs kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Çerağī Hamza mahallesinde umdetü’l-müderrisîni’l-kirâm zübdetü’l-mütehakkikīni’l-fihâm Abdülcelil Efendi b. Mustafa Efendi’nin sâkin olduğu menziline varıp zeyl-i rakīmde muharrerü’l-esâmî olan müslimîn huzûrlarında akd-i meclis-i şer‘-i şerîf eyledikde yine mahmiye-i mezbûre mahallâtından Akseki mahallesi sükkânından olup umdetü’l-ulemâ’i’l-izâm zübdetü’l-fuzalâ’i’l-fihâm sâbıkan Bosna kadısı olan Başmakcızâde demekle şehîr Mehmed Efendi b. mevlâ el-merhûm Mehmed Efendi meclis-i ma‘kūd-ı mezbûrda, kendi vakfına meşrûtiyyet üzre mütevelliye olan işbu bâ‘isetü’l-kitâb Ayşe Hâtun bt. Sefer Efendi mahzarında ikrâr ve takrîr-i kelâm edip mâl-ı vakf-ı mezbûrdan olmak üzre mütevellîye-i merkūme Ayşe Hâtun yedinden istikrâz ve kabz ve tesellüm eylediğim iki bin yüz esedî guruş ve semenleri târih-i kitâbdan bir sene müeccel olmak üzre safka-i vâhide ile mezbûre Ayşe Hâtun yedinden iştirâ ve kabz eylediğim bir cild Çârperdî nüshası Keşşâf ve bir cilde mükemmel Kadı ve bir Mushaf-ı şerîf hediyesinden dahi üç yüz esedî guruş ki cem‘an iki bin dört yüz esedî guruş mütevellîye-i merkūme Ayşe Hâtun’a deynim olup mukābelesinde mahalle-i mezbûre Akseki’de vâki‘ bir tarafdan Ahmed Efendi b. Mahmud mülküne ve bir tarafdan Süleyman Çelebi b. Emrullah mülküne ve iki tarafdan tarîk-i âma müntehî dâhiliyye ve hâriciyye büyût-ı müte‘addideyi müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık ba‘de’t-tahliyye[ti’ş-şer‘î] ve’t-takābuzi’l-mer‘î mezbûre Ayşe Hâtun yedinde rehin vaz‘ ve teslîm ol dahi vech-i muharrer üzre irtihân ve kabûl ve kabz ve tesellüm eyledi dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde ba‘de’t-tahrîr ma‘an irsâl olunan Muhzır İbrahim ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Hurrire fi’l-yevmi’s-sâbi‘ aşer min Cemâziyelevvel li sene erba‘a ve seb‘în ve elf. Şuhûdü’l-hâl: Umdetü’l-müderrisîni’l-kirâm Abdülcelil Efendi, Fahrü’l-kuzât Sunullah Efendi, Mahmud Efendi b. el-Hâc Musa, Yusuf b. Abdullah, Ali b. Şaban ve gayruhüm.