İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 868 Hüküm no: 1189 Orijinal metin no: [125a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden el-Hâc Kasım Ağa b. Abdülmennân’ın, eski patrik Bartinoz v. Simo’da olan alacağının tahsili Husûs-ı âti’l-beyânın mahallinde tahrîri için kıbel-i şer‘-i mutahhardan Mevlânâ Ömer Efendi b. İsmail irsâl olunup ol dahi mahmiye-i İstanbul’da Nişancı Cafer Çelebi mahallesinde Yorgaki v. Dimitraşko nâm zimmînin menziline varıp zeyl-i kitâbda isimleri mastûr olan müslimîn mahzarlarında akd-i meclis-i şer‘-i kavîm eyledikde mahmiye-i mezbûrede Şir Merd Çavuş mahallesi sâkinlerinden sâbıkan sekbanbaşı iken fevt olan el-Hâc Kasım Ağa b. Abdülmennân’ın verâseti, zevce-i metrûkesi Ümmühânî Hâtun ile sulbiye kebîre kızı Fahri Hâtun’a ve sulbiye sagīre kızı Afife Hâtun’a münhasıra olduğu mütehakkik oldukdan sonra sagīre-i mezbûrenin kıbel-i şer‘den mansûbe vasîsi olan vâlidesi merkūme Ümmühânî Hâtun ile mezbûre Fahri Hâtun taraflarından husûs-ı âtîye vekîl olup vekâleti mezbûretân Ümmühânî ve Fahri Hâtun’un zâtlarını ma‘rifet-i şer‘iyye ile ârifân olan el-Hâc Handan b. Abdülmennân ve Ahmed Beşe b. Abdullah şehâdetleri ile sâbite olan merkūme Fahri Hâtun’un zevci Ali Ağa b. Abdurrahman hâlâ tâife-i nasârâya patrik olan Diyonisyoz v. Yani nâm râhib muvâcehesinde ikrâr ve takrîr-i kelâm edip sene seb‘a ve sittîn ve elf târihinde tâife-i mezbûreye patrik olan Bartinoz v. Simo nâm râhibin merhûm-ı merkūm el-Hâc Kasım Ağa’ya deyn-i şer‘îden on bin yedi yüz otuz üç guruş deyni olmağla mezbûrun mecmû‘una emr ve kabûlü hâviye kefâlet-i sahîha-i şer‘iyye ile merkūm Diyonisyoz ve medîne-i Manisa metrepolidi Babişyoz v. Manol ve Kayseriye metrepolidi İmtoz v. Yorgi ve Ereğli metrepolidi Makatyoz v. Yorgi ve Kapıdağı metrepolidi Metrefatoz v. İstemad ve İznikmid metrepolidi Kirilos v. Mihal ve İznik metrepolidi Tetnas v. Manol ve Kadıköy metrepolidi Avril v. Yorgi ve Trabzon metrepolidi Londeryoz v. Dimo ve Selânik metrepolidi Bakim v. Dimo ve Edirne metrepolidi Niyofoz v. Kostantin ve Filibe metrepolidi Avril v. İstefan ve Yenişehir metrepolidi Yanşiyoz v. Yani ve Bursa metrepolidi Dikyoz v. Luka ve Siroz metrepolidi Kirilos v. Yani ve Tırnova metrepolidi Diyonisyoz v. Nalça ve Silistre metrepolidi Makaryos v. Ostoyan ve Dimetoka metrepolidi Yakoz v. İskerlet ve Ahyolu metrepolidi Bakim v. Manol ve Misivri metrepolidi Demaskinoz v. İstayi ve İbrail metrepolidi Kirilos v. Simo, Vidin metrepolidi Stermarinoz v. Yani ve Yanya metrepolidi Kaltinoz v. Pako ve Narda metrepolidi Gavril v. Apolos ve Sofya metrepolidi Danyal v. Kosta ve Midilli metrepolidi Eğriboz v. İstemad ve Molova metrepolidi Makaryos v. Yani ve Rodos metrepolidi Bakim v. Kostantin ve İzmir metrepolidi Makaryos v. Tero ve Sakız metrepolidi Nikigoz v. Franko ve Karaferye metrepolidi Bakim v. Yani ve Alasonya metrepolidi Yomanoz v. Simo ve İstefe metrepolidi Pazacek? v. Nikola ve Adana metrepolidi Antimoz v. Yorgo ve Eğriboz metrepolidi Makaryoli v. Atanaş ve Diyârbekir metrepolidi Pasof v. Yani ve Ballıbadra [metrepolidi] Mikail v. Simo ve Gördes metrepolidi Makaryos v. Dimitri ve Mizistre metrepolidi Gavril v. Yani ve Menkese metrepolidi Bondoryoz v. Keman [125b] ve Varna metrepolidi Danyal v. Atanaş ve Havra metrepolidi Kozma v. Dimo ve Marmara metrepolidi Armiya v. Yani ve İnöz metrepolidi Nikifori v. Dimo ve Marine metrepolidi Pakratyoz v. Yani ve İlitse metrepolidi Todoşyoz v. Kosta ve Silivri metrepolidi Militoz v. Dimo ve Terkos metrepolidi Atanaş v. Yorgi nâm metrepolidler kefîl olmuşlar idi. Meblağ-ı mezbûrun altı bin dokuz yüz otuz üç guruşunu bundan akdem yedlerinden ahz u kabz edip kefâletleri hasebiyle zimmetlerinde üç bin sekiz yüz guruş bâkī kalmış idi hâlâ meblağ-ı bâkī üç bin sekiz yüz guruşa dahi bi’t-tamâm patrik-i mezbûr Diyonisyoz yedinden vekâlet-i mahkiyyem hasebiyle alıp kabz eyledim ba‘de’l-yevm merkūm Diyonisyoz’un ve sâir küfelâ-yı merkūmuna kefâlet-i mezbûreden berîler olup kıbellerinde vechen mine’l-vücûh ve sebebin mine’l-esbâb hak ve alâka kalmadı dedikde vâki‘ hâli Mevlânâ-yı mezbûr alâ vukū‘ihi mahallinde ba‘de’t-tahrîr, ma‘an ba‘s olunan Abdi Çelebi b. Hüseyin ve Nasûh Bey b. Yusuf ile meclis-i şer‘-i hatîre gelip inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis aşer min Cemâziyelevvel li sene seb‘în ve elf. Şuhûdü’l-hâl: Çorbacı Hasan İsâ Ağa b. Ahmed, Mehmed Ağa b. Hasan, İbrahim Efendi b. Ahmed, el-Hâc Ali b. Mustafa, Mustafa Beşe b. Mehmed ve gayruhüm.