İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 870 Hüküm no: 1191 Orijinal metin no: [125b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimnevitori bt. Gavra’nın menzilini Vartin v. Altun ile Yakob v. Rosak’a sattığı Mahmiye-i İstanbul’da Kasım Ağa mahallesinde sâkine Dimnevitori bt. Gavra nâm nasrâniyye meclis-i şer‘-i hatîr-i lâzımü’t-tevkīrde işbu bâ‘isü’s-sifr Vartin v. Altun ve Yakob v. Rosak nâm Ermeniler muvâcehelerinde ikrâr ve takrîr-i kelâm edip mahalle-i mezbûrede vâki‘ bir tarafı ba‘zan Hüseyin Efendi vakfı yağ hânesi ve ba‘zan Ayşe bt. Abdi Efendi nâm hâtun mülk menzili ve bir tarafı Meryem bt. Abdullah nâm hâtunun mülk bezirhânesi ve iki tarafı tarîk-i âm ile mahdûd olup dâhiliyyesi dört bâb fevkānî büyûtu ve bir tahtânî odayı ve bir bâb mahzeni ve bi’r-i mâyı ve cüneyneyi ve kenîfi ve bir kileri ve matbahı ve fırını ve hâriciyyesi bir bâb fevkānî odayı ve tahtında ahırı ve bi’r-i mâyı ve muhavvata ve kenîfi müştemil olan mülk menzilimi, cemî‘ tevâbi‘ ve levâhıkı ile mezkûre Vartin ve Yakob’a yüz otuz bin nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ ve teslîm eyledim. anlar dahi iştirâ ve kabûl ve tesellüm eylediklerinden sonra semeni olan meblağ-ı merkūm yüz otuz bin akçeyi merkūmân Vartin ve Yakob yedlerinden tamâmen alıp kabz eyledim ba‘de’l-yevm menzil-i mersûm mesfûrân Vartin ve Yakob’un mülk-i müşterâlarıdır, keyfe mâ yeşâ’ ve yahtâr mutasarrıf olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: Es-Seyyid Mehmed Efendi el-kadı, es-Seyyid Cafer Çelebi b. es-Seyyid Abdülkerim, es-Seyyid Mustafa Çelebi b. Hızır, es-Seyyid Mehmed Çelebi b. es-Seyyid Cafer, İbrahim Efendi b. Mahmud el-İmâm, İsmail Çelebi b. Ali, Papa Yani v. Panayot, Vasil v. Mosi?, Kirko[r] v. Minho, Tanaş v. Yorgi, Nikola v. Pireşkova, Murad v. Melkon, Nerlos v. Raba? ve gayruhüm.