İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 870 Hüküm no: 1192 Orijinal metin no: [125b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vartin v. Altun ve Yakob v. Rosak’ın menzillerini el-Hâc İbrahim vakfına bey‘ bi’l-istiğlâl yoluyla sattıkları Mahmiye-i İstanbul’da Kasım Ağa mahallesi sükkânından Vartin v. Altun ve Yakob v. Rosak nâm Ermeniler meclis-i şer‘-i hatîr-i lâzımü’t-tevkīrde el-Hâc İbrahim vakfı olan nukūdun bi’l-fi‘l mütevellîsi olan Mehmed Çelebi b. Süleyman mahzarında her biri ikrâr ve i‘tirâf edip vakf-ı mezbûr malından mütevellî-i mezbûr Mehmed Çelebi yedinden iktirâz ve kabz eylediğimiz otuz bin akçeye mahalle-i mezbûrede bir tarafı ba‘zan Hüseyin Efendi’nin vakıf yağhânesi ve ba‘zan Ayşe bt. Abdi Efendi nâm hâtun mülk menzili ve bir tarafı Meryem bt. Abdullah nâm hâtunun mülk bezirhânesi ve iki tarafı tarîk-i âma müntehî hâriciyye ve dâhiliyye büyût-ı adîdeyi hâvî mülk menzilimi mütevellî-i mersûme bey‘ ve teslîm ol dahi mâl-ı vakf-ı mezbûr ile bi tarîki’l-istiğlâl iştirâ ve tesellüm eyledikden sonra ba‘de’t-tahliyyeti’ş-şer‘iyye menzil-i mezbûru târih-i kitâbdan bir sene tamânına değin dört bin beş yüz akçe ücret-i müeccele ile bize îcâr ve teslîm ben dahi minvâl-i muharrer üzre istîcâr ve tesellüm eyledik dediklerinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: Es-Sâbikūn.