İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 871 Hüküm no: 1193 Orijinal metin no: [126a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muharrem b. Osman’ın, tereke hususunda Seyyid Mehmed Ağa b. Seyyid Mustafa’nın zimmetini ibrâ ettiği Mahrûse-i Galata müzâfâtından Kasımpaşa kasabasında Câmi‘-i Kebîr mahallesinde sâkine iken bundan akdem vefât eden Şerife Âbide bt. es-Seyyid İbrahim nâm hâtunun verâseti, zevc-i metrûkü es-Seyyid Mehmed Ağa b. es-seyyid Mustafa ile li ebeveyn ammi oğlu Muharrem b. Osman nâm kimesneye münhasıra olduğu şer‘an zâhir ve müte‘ayyin oldukdan sonra merkūm Muharrem meclis-i şer‘-i hatîrde işbu bâ‘isü’l-kitâb mezkûr es-Seyyid Mehmed Ağa tarafından husûs-ı âti’l-beyâna vekîl olup vekâleti mahalle-i merkūme sükkânından el-Hâc Mahmud b. Hüseyin ve Ali Halîfe b. İbrahim nâm kimesneler şehâdetleri ile şer‘an vekâleti sâbite olan Mehmed Çelebi b. Halil nâm kimesne mahzarında ikrâr ve takrîr-i kelâm edip bundan akdem mûrisemiz müteveffât-ı mersûmenin muhallefâtı zâhirde mevcûd olan eşyâya münhasıra olmak zu‘muyla muhallefât-ı mevcûdeden müvekkil-i mezbûr es-Seyyid Mehmed Ağa muhallefât-ı mezkûreye vâzı‘u’l-yed olmağla hisse-i şer‘iyyemden yüz guruş üzerine merkūm es-Seyyid Mehmed Ağa ile müsâlaha olmuşidim. Lâkin müteveffât-ı mersûmenin mevcûde olan muhallefâtından olup Merhabazâde Ahmed Efendi zimmetinde zuhûr eden dört yüz guruşda olan hisse-i şer‘iyyemden zuhûr eden muhallefât-ı bâkiyeden hisse-i şer‘iyye-i mevrûsemi müvekkil-i merkūm es-Seyyid Mehmed Ağa’dan taleb eylediğimde ol dahi inkâr etmekle beynimizde münâza‘ât-ı kesîre cereyânından sonra tavassut-ı muslihîn ile müvekkil-i mezbûr es-Seyyid Mehmed Ağa benimle muhallefât-ı bâkiyeden olan hisse-i şer‘iyyemden iki yüz esedî guruş üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mesfûr iki yüz esedî guruşu vekîl-i merkūm Mehmed Çelebi yedinden meclis-i şer‘de tamânen alıp kabz ettikden sonra zikr olunan mûmâ-ileyh Ahmed Efendi zimmetinde dört yüz guruşdan olan hisse-i şer‘iyyemden mâ‘adâ cemî‘ muhallefât-ı müteveffât-ı mezbûreye nukūd ve menkūl ve esâs-ı beyt ve evânî-i nühâsiyye ve gayr-ı nühâsiyye ve bi’l-cümle ism-i mal ıtlâk olunur gerek zâhir ve gerek hafî cemî‘ terekesine müte‘allika olan cemî‘ de‘âvî ve mütâlebât ve eymân ve muhâsamâtdan müvekkil-i merkūm es-Seyyid Mehmed Ağa’yı ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Cemâziyelevvel li sene erba‘a ve seb‘în ve elf. Şuhûdü’l-hâl: Es-Seyyid İbrahim Çavuş b. es-Seyyid Halil, es-Seyyid Mehmed Çavuş b. ( ), es-Seyyid Ali Çavuş b. Mustafa, es-Seyyid Mehmed b. es-Seyyid Abdullah, es-Seyyid Mehmed b. es-Seyyid Ahmed ve gayruhüm.