İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 872 Hüküm no: 1194 Orijinal metin no: [126a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Efendi b. Abdülazîz Efendi’nin kölesi İdris’i azat ettiği Hâlâ mahrûse-i Galata’da icrâ-yı ahkâm-ı şer‘iyye eden a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâil ve’l-me‘âlî, metbû‘ü’l-efâzıl ve’l-e‘âlî allemü’l-ilme ve hüdâ menârü’l-fazl ve’t-tükā hazret-i Yahya Efendi b. el-mevlâ el-merhûm Abdülazîz Efendi meclis-i şer‘-i şerîf-i Ahmedî ve mahfil-i dîn-i münîf-i Mustafavî’de ikrâr-ı tâm ve takrîr-i kelâm edip kendilere rıkk-ı sâbıkını mu‘terif olan işbu orta boylu Tuncûri’l-asl İdris nâm Arab abd-i memlûklerini, hasbeten lillâhi te‘âlâ ve taleben li merzâti Rabbi’l-a‘lâ mallarından ikrâr edip tahrîr ve i‘tâk ve zümre-i ahrâra ilhâk eyledim ba‘de’l-yevm mezbûr İdris sâir ahrâr-ı asliyyîn gibi hür olup üzerinde mevâlî için olan hakk-ı velâdan gayrı hak ve alâkam kalmadı dediklerinde, mâ vaka‘a bi’t-taleb ketb olundu. Fi’l-âşir min Cemâziyelevvel li sene erba‘a ve seb‘în ve elf. Şuhûdü’l-hâl: El-Hâc Kenan Bey kethüdâ, el-Hâc Mehmed Efendi el-Kâtib, Ali Ağa kethüdâ-yı sâbık, Bekir Beşe b. ( ) çukadar ve gayruhüm.