İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 872 Hüküm no: 1195 Orijinal metin no: [126a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Bey b. Ebûbekir’in, Ali Çavuş b. Ramazan’da alacağı olduğu Mahmiye-i İstanbul hısn-ı ebvâbından Bahçekapısı kurbunda sâkin işbu râfi‘ü’l-kitâb Ömer Bey b. Ebûbekir mahfil-i kazâda, Ali Çavuş b. Ramazan mahzarında üzerine takrîr-i da‘vâ edip bundan akdem mezkûr Ali Çavuş zimmetinde cihet-i karzdan yüz otuz beş bin akçe ve üzerine devr-i şer‘î ile ilzâm-ı ribh olunan on beş bin akçe ki cem‘an yüz elli bin akçe hakkım olup hattâ deyn-i mezkûru nâtık ve hat ve hâtemini hâvî yedime temessük verdikden sonra meblağ-ı merkūmun altmış altı bin altı yüz otuz beş akçesini ahz u kabz edip zimmetinde seksen üç bin üç yüz altmış beş akçe bâkī kalmışdır hâlâ taleb ederim, suâl olunsun deyû vech-i muharrer üzre deyn-i mezkûru nâtık ve hat ve hâtemini hâvî temessük ibrâz edip mezkûr Ali Beşe muvâcehesinde kırâ’at ve istintâk olundukda cevâbında muztar olduğum ecilden vech-i muharrer üzre işbu temessükü yedine vermişdim, lâkin cihet-i karz-ı şer‘îden ancak mezkûr Ömer Bey’e yüz yirmi bin akçe deynim olup mâ‘adâ olan otuz bin akçenin on beş bin akçesinde kâziben ikrâr eyledim ve on beş bin akçesi vech-i muharrer üzre devr olunmamışdır. Ol vechile altmış altı bin altı yüz otuz beş akçenin kabzına mu‘terif olduğu ecilden, zimmetimde lâzımü’l-edâ ve vâcibü’l-kazâ elli üç bin üç yüz altmış beş akçesi bâkī kalmışdır deyicek mezkûr Ömer Bey’den meblağ-ı mezbûr on beş bin akçe vech-i muharrer üzre devr-i şer‘î olduğuna beyyine taleb olundukda ityân-ı beyyine için istimhâl edip mehl-i şer‘î ile imhâl olundukdan sonra mezkûr Ali Çavuş ikrârında kâzib olmayıp ve üzerine eylediği ziyâde on beş bin akçe da‘vâsından mubtıl olmadığına mukarrun-leh olan müdde‘î-i mezbûr Ömer Bey’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince altmış sekiz bin üç yüz altmış beş akçeyi müdde‘î-i mezbûra edâ ve îfâya mezbûr Ali Çavuş’a tenbîh birle mâ vaka‘a bi’t-taleb ketb olundu. Hurrire fi’l-târihi’l-mezbûr. Şuhûdü’l-hâl: Abdülkerim Ağa b. Bâli, el-Hâc Ahmed b. Mahmud, Nasûh b. ( ) Çukadar, Mustafa b. Ali, Veli b. Mahmud, Mehmed b. Ramazan ve gayruhüm.