İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 873 Hüküm no: 1196 Orijinal metin no: [126b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Abdünnebi’nin menzil vakfı ve mütevellî tayini Husûs-ı âti’l-beyânın mahallinde tahrîri için bi’l-iltimâs kıbel-i şerî‘at-ı mergūbeden irsâl olunan Mevlânâ Mustafa Efendi zikri âtî menzile varıp zeyl-i rakīmde isimleri mastûr olan müslimîn huzûrlarında akd-i meclis-i şer‘-i hatîr eyledikde mahmiye-i İstanbul’da Çıkrıkçı Kemal mahallesinde sâkine olup umdetü’l-müderrisîni’l-kirâm Resûl Efendi b. Musa ve Atâullah Çelebi b. Osman ta‘rîfleri ile mu‘arrefe olan umdetü’l-muhadderât zübdetü’l-muvakkarât Fâtıma Hâtun bt. Abdünnebî meclis-i ma‘kūd-ı mezbûrda, işbu kitâb-ı sıhhat-nisâb-ı yed-i kerîmelerine vusûl ile şeref-yâb, sâbıkan Sofya kadısı olan umdetü’l-ulemâ’i’l-izâm zübdetü’l-fuzalâ’i’l-fihâm Hasan Efendi b. Süleyman mahzarında takrîr-i kelâm edip bu fakīre-i kesîretü’t-taksîr mürg-i cânım âşiyân-ı tenden tayerân etmeden bu dünyâ-yı dûnu tefekkür ve kendi hâlimi tezekkür eylediğimde hulûs-ı niyet ve sıdk-ı taviyyet ile küllü nefsin zâ’ikatü’l-mevt ve küllü hayyin yülâkīhi’l-fevt ve lâ şekke inne’l-emre kezâlik ve inne cemî‘a mâsivâllâhi te‘âlâ fehüve hâlikün mısdâk ve muktezâsınca emr-i Yezdânî ile melekü’l-mevt girîbân-ı hayâtımı çâk ve cism-i nâ-tuvânımın menzilinden hâk edip sem‘-i rûh-ı revânım yâ eyyetühe’n-nefsü’l-mutma’inne irci‘î ilâ Rabbiki râdıyeten marziyye nidâsını gûş ve dest-i sâkī-i ecelden fenâ câmını nûş ve kârbâr-ı âlemi bi’l-külliye ferâmûş eylediğimde silk-i mülk-i sahîhimde münselik olup bir tarafı Süleyman Paşa menziline ve bir tarafı Beyzâde ( ) vakfına ve bir tarafı mezbûr Hasan Efendi benden iştirâ eylediği hâriciyye ta‘bîr olunur menzile ve bir tarafı tarîk-i âma müntehî fevkānî iki oda ve iki sofa ve dehliz ve kenîf ve tahtında iki oda ve bir sofa ve bir matbah ve bir hamam ve sofa ve zât-ı eşcâr bahçe ve sofa ve havuz ve muhtib ve havlu[yu] müştemil dâhiliyye ta‘bîr olunur mülk menzilim hasbeten lillâhi’s-samed vakf-ı sahîh-i mü’eyyed ile vakf ve haps edip şöyle şart eyledim ki ol menzil-i mevkūf-ı mezbûrda mezkûr Hasan Efendi’nin halîle-i celîleleri kıdvetü’l-mükerremât Şerife Ayşe Hâtun bt. es-Seyyid Hüseyin nâm hâtun sâkine olup vefâtından sonra batnen ba‘de batnin evlâdı ve evlâd-ı evlâdı ve evlâdı-ı evlâd-ı evlâdı sâkin olalar mukābelesinde her gün tilâvet edip rûhuma ihdâ edeler ve ba‘de inkırâzi’l-kül menzil-i mevkūf-ı mezbûr ber vech-i mu‘tâd ve icâre-i mu‘accele ve müeccele ile îcâr olunup hâsıla olan ücreti ve mu‘accele-i mezbûre dahi alâ vechi’l-helâl istirbâh ve istinmâ olunup nemâsı sene be sene Medîne-i Münevvere fukarâsına irsâl oluna ve menzil-i mevkūf-ı mezbûru meşrût mahzında her biri nevbetlerinde kendi mallarından imâret ve meremmet edeler ve menzil-i mezkûra mûmâ-ileyh Hasan Efendi hasbî mütevellî ola ve bunu tenfîze mezkûr Hasan Efendi’yi vasiyy-i muhtâr nasb ve ta‘yîn eyledim dedikde mersûm Hasan Efendi dahi vesâyet-i mezbûreyi kabûl ve merâsimini edâya müte‘ahhid olduğunu Mevlânâ-yı mersûm mahallinde ba‘de’t-tahrîr, ma‘an ba‘s olunan çukadar Nasûh Beşe b. Yusuf ve Ali Beşe b. Abdullah ile meclis-i şer‘a gelip alâ vukū‘ihi ihbâr etmeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: A‘lemü’l-ulemâ’i’l-izâm efdalü’l-fuzalâ’i’l-kirâm Abdullah Efendi el-kadı bi medîne-i Haleb sâbıkā, umdetü’l-ulemâ’i’l-izâm zübdetü’l-fuzalâ’i’l-fihâm İbrahim Efendi el-Kadı bi medîne-i Sakız sâbıkā, Fahrü’l-müderrisîni’l-kirâm Mustafa Efendi b. el-Hâc Hasan, İsâ Beşe b. Mustafa er-Râcil, Abdullah Çelebi b. Ahmed, Ali Beşe b. Abdullah, Mehmed Efendi b. Abdüsselam, İsmail b. Mehmed, İbrahim b. Mehmed, Eyüb b. İsmail, el-Hâc Hasan b. Abdullah.