İstanbul Mahkemesi 12 Numaralı Sicil (H. 1073-1074/M. 1663-1664) cilt: 16, sayfa: 886 Hüküm no: 1209 Orijinal metin no: [129b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İskenderun ve Haleb gümrüğü emini Mehmed Ağa b. Mehmed’in Haleb Mütesellim’i İbrahim Ağa b. Abdülmennân’da alacağı olduğu Bin yetmiş iki senesinde medîne-i Halebü’ş-şehbâ ma‘a İskenderun gümrüğü emîni olan işbu râfi‘ü’l-kitâb umdetü’l-a‘yân zübdetü’l-erkân Mehmed Ağa b. Mehmed dîvân-ı kāimmakām-ı sadr-ı a‘zamîde ma‘kūd mahfil-i kazâda, sene-i mezbûrede medîne-i Haleb’de mütesellim olan kıdvetü’l-emâsil ve’l-a‘yân İbrahim Ağa b. Abdülmennân mahzarında üzerine takrîr-i da‘vâ edip mezbûr İbrahim Ağa medîne-i mezbûrede mütesellim iken sene-i mezbûreye mahsûb olmak üzre bana deruhde olunan medîne-i mezbûre ile İskenderun gümrüğünü zabt için sene-i mezbûre Muharremi’nin ikinci gününde bin üç yüz kıt‘a riyâlî guruş ve mülhakı olan zikr olunan İskenderun gümrüğü[nü] zabt için sene-i mezbûre Saferü’l-hayrı gurresinden altı yüz elli riyâlî guruş ki cem‘an bin dokuz yüz kıt‘a riyâlî guruş def‘ ü teslîm ol dahi ahz u kabz etmiş idi hâlâ meblağ-ı mezbûr bin dokuz yüz elli riyâlî guruşu taleb ederiz suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i İstanbul’da Şehremîni çarşısı kurbunda Ereğli mahallesinde sâkin fahrü’l-a‘yân Kâmil Bey b. Mustafa ve Molla Gürânî mahallesinde kıdvetü’l-erkân Mustafa Bey b. Mehmed nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ târih-i mezbûrda mezkûr İbrahim Ağa medîne-i mezbûrede mütesellim olmağla zikr olunan gümrükleri zabta müdde‘î-i mezbûra mâni‘ olmak ile mâni‘ olmamak için işbu İbrahim Ağa’ya bizim huzûrumuzda alâ tarîki’r-rüşvet medîne-i mezbûre gümrüğünü zabt için sene-i mezbûre Muharremi’nin ikinci gününde bin üç yüz riyâlî guruş ve mülhakı olan zikr olunan İskenderun gümrüğünü zabt için sene-i mezbûre Saferi gurresinde altı yüz elli riyâlî guruş cem‘an bin dokuz yüz elli riyâlî guruş def‘ ü teslîm edip mezkûr İbrahim Ağa dahi ahz u kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şâhidân-ı mezbûrânı ta‘dîl ve tezkiyye için kıbel-i şerî‘at-ı mergūbeden mevsûkun-bih ve mu‘temedün-aleyh olan Mustafa Efendi şâhidlerin olduğu mahallelere irsâl olunup ol dahi varıp vech-i şer‘î üzre ta‘dîl ve tezkiyye eyledikde zikr olunan Ereğli mahallesi ahâlîsinden Musa Efendi b. İlyas el-imâm ve Ramazan Halîfe b. Mustafa el-Müezzin ve Mehmed b. Ali ve Hasan b. Mehmed ve Mustafa Bey b. Ali ve Ali Beşe b. İsâ ve Halil b. Mustafa ve Mustafa Bey b. Abdülbâkī ve Ali b. Murtaza ve Ebûbekir b. Mehmed ve Ebûbekir b. Mustafa ve Molla Gürânî mahallesi ahâlîsinden Ahmed Efendi b. İbrahim el-imâm ve Hüseyin Çelebi b. Sinan el-Müezzin ve Ahmed b. Ferhad el-Müezzin ve Çavuşzâde Ahmed Çelebi ve Ali Kaya Bey b. Hasan ve Rıdvan b. Abdullah ve İvaz Bey b. Derviş ve Osman Bey b. Mehmed ve Hüseyin Bey b. Ali nâm kimesneler şâhidân-ı mezbûrân için sâlih ve adl ve makbûlü’ş-şehâdelerdir dediklerinde, meclis-i şer‘a gelip ma‘an irsâl olunan çukadar Abdurrahman Beşe ve Abdullah Çelebi ile haber verdiklerinden sonra şehâdetleri makbûle olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cemâziyelevvel li sene erba‘a ve seb‘în ve elf. Şuhûdü’l-hâl: Umdetü’l-a‘yân Abdurrahman Ağa serçavuşân, eş-Şeyh Mustafa Efendi b. Mehmed, Fahrü’l-a‘yân Ali Ağa b. Hasan, Abdülkerim Ağa b. Bâli, Nasûh Beşe b. Yusuf, Abdi Çelebi b. Hüseyin ve gayruhüm.